திண்ணை

SOPA.. நாம்.. கட்டற்ற இணையம்.

2012-01-19T08:16:00.000+05:30

சில நாட்களாக ஊடகங்களில் பலமாக அடிபடும் சொற்கள் தான் SOPA(Stop Online Piracy Act), PIPA(PROTECTIP Act). .அமெரிக்காவிலும் ஏனைய பாகங்களிலும் இணையத்தளம் மூலம் இடம்பெறும் காப்புரிமை மீறல்களை கட்டுப்படுத்துவதற்காக அமெரிக்க செனற்றில் நிறைவேற்ற முயலும் இரு சட்ட மூலங்கள் தான் இவை..

இந்தச் சட்டங்கள் என்ன தான் செய்யப்போகின்றன? உதாரணமாக இப்போதெல்லாம் ஒரு திரைப்படம் வெளிவந்து திரையரங்குகளில் வந்தவுடனேயே ஏன் சிலசமயங்களில் வரமுதலே இணையத்தளங்களில் இலவசமாக தரவிறக்கக் கூடியதாக செய்துவிடுகிறார்கள் அல்லவா..அதேபோல் பாடல்கள் மற்றும் இசைத்தொகுப்புகளின் நிலையும் இதே தான்.இதனையெல்லாம் தடுப்பது தான் இந்தச் சட்டங்களின் வெளிப்படையான நோக்கம்.

உதாரணமாக

youtube ல் நாளந்தம் பார்த்து ரசிக்கும் பாடல்கள், நகைச்சுவைகள்..
வெளியான உடனேயே தரவிறக்கி கேட்டுவிடத்துடிக்கும் எம்மைப் போன்ற விசிறிகள்..
மொழிகடந்து இலவசமாகவே Torrent உதவியுடன் தரவிறக்கி பார்த்துவிடும் பல்வேறு மொழிப் படங்கள்..
இலவசமாகவே தரவிறக்கிவிடும் e புத்தகங்கள்..

இங்கே தான் பிரச்சினை எழுகின்றது...

இதற்கு ஆதரவாகவும் எதிராகவும் பலமான கோசங்கள் உலகெங்கும் எழ ஆரம்பித்துள்ளது. காப்புரிமையப் பேணுவது அவசியமானது என்ற அடிப்படையில் இதற்கு ஆதரவானவர்களும்,இது இறுதியில் கட்டற்ற இணையத்தைக் கட்டுப்படுத்தி சுதந்திர கருத்துரிமையை மீறுவதிலே தான் முடியும் என இத்ற்கு எதிரானவர்களின் வாதங்களும் எழ ஆரம்பித்துள்ளன.இது Wikipedia போன்ற பல இலட்சம் பார்வையாளர்களை நாளொன்றிற்குக் கொண்டுள்ள இணையத்தளாங்களின் ஒருநாள் Blackout (ஒரு வகையிலான கடையடைப்பு ;-) ) போராட்டம் வரை இதுவரை சென்றுள்ளது.

பல கோடிகளோ இலட்சங்களோ செலவுசெய்து மேலும் காப்புரிமை பெற்று தயாரிக்கப்படும் திரைப்படங்களோ இசைத்தொகுப்புக்களோ ஏனைய அம்சங்களோ சட்டவிரோ தமான முறையில் இணையத்தளங்களில் தர வேற்றப்படுவதால் அதனை வெளியிடும் நிறுவனங்களிற்கு பெருமளவு வருமான இழப்பு ஏற்படுகிறது .. இது அடிப்படையில் அந்த துறை(Industry)யையே படிப்படியாகப் பாதிக்கச் செய்கிறது.தொடர்ந்து அந்த துறையையே ஆட்டங்காணச் செய்கையில் அந்தத் துறையயே நம்பி வாழும் அன்றாடங்காய்ச்சிகளின் அடிவயிற்றில் இறுதியாகக் கைவைக்கின்றது.ஆகவே இதனைத் தடுத்தேயாக வேண்டும் என இதனை ஆதரிப்பவர்கள் வாதாடுகிறார்கள்.

ஆனால் சட்டங்கள் போட்டுத் தடுப்பதனால் எதுவும் நிகழ்ந்துவிடப் போவதில்லை. தொழிநுட்பங்களில் கைதேர்ந்தவர்களாலேயே இதுபோன்ற தளங்கள் நடாத்தப்படுவதால் அவர்கள் வேறுவழிகளில் இதனைக் கொண்டு செல்வார்கள். ஆனால் அடிப்படையில் பாதிக்கப்படப் போவது என்னவோ இது போன்ற காப்புரிமைபெறப்பட்ட பொருட்களைக் கட்டனங்செலுத்திப் பெறமுடியாதவர்களே எனவும் வாதாடுகிறார்கள். குறிப்பாக எல்ல நாட்டுச் சந்தைகளுக்கும் எல்லாப் பொருளும் எளிதில் வந்தடைவதில்லையெனவும், அவ்வாறான பிரதேசங்களில் வாழ்பவர்களையே இது பாதிக்கும் எனவும் வாதாடுகின்றார்கள். மாறாக இந்தச் சட்டமூலங்கள் புத்தாக்கங்களில் ஈடுபடும் சிறிய நிறுவனங்களை சட்டங்களிலுள்ள ஓட்டைகளப் பயன்படுத்தி பெரிய நிறுவனங்கள் அடிமைப்படுத்திவிடவே ஊக்குவிக்கும் எனவும் வாதாடுகிறார்கள்.

சட்டம் போட்டுத் தடுக்கிற கூட்டம் தடுத்துக் கொண்டே இருக்க திட்டம் போட்டுத் திருடிற கூட்டம் திருடிக்கொண்டேயிருக்கும் என்பது இவர்களது வாதம்.இதற்கு மாறாக சட்டங்களை இயற்ற செலவு செய்யும் நேரத்தையும் பணத்தையும் இவ்வாறன செயற்பாடுகளைத் தடுக்கப் புதிய தொழிநுட்பங்களை அறிமுகப்படுத்துவதில் செலவுசெய்வதே சிறந்தது என்கிறார்கள் இந்தச் சட்டமூலத்தை எதிர்ப்பவர்கள்.

எது எவ்வாறானாலும் இந்தச் சல்லமூலம் நிறவேற்றப்படுமா, அல்லது பல்வேறு மற்றங்களிற்கு உட்பட்டு நிறைவேற்றப்படுமா, நிறவேற்றப்பட்டாலும் எவ்வாறு அமுல்படுத்தப்படப் போகின்றது என்பதை பொறுத்திருந்துதான் பார்க்க வேண்டும்.

இந்தச் சட்டமூலங்கள் பற்றி நான் அண்மைய நாட்களில் இணையத்தில் வாசித்த ஆக்கங்களின் அடிப்படையில் மேலெழுந்தவாரியாகவே இங்கு விளக்கியிருக்கிறேன்.மேலும் படிக்க கீழுள்ள இணைப்புக்களைச் சொடுக்குங்கள்.

Stop Online Piracy Act.

இதர ஆக்கங்களிற்கு..

நான்.. விவாதம்.. TinTin..

2012-01-03T20:41:00.002+05:30

அது.. முகமூடி மாயாவி எங்கள் கல்லூரி வகுப்பறைகளில் பிரபலமாயிருந்த காலம்..நாமெல்லாம் சுழற்சி முறையில் நம்மிடையே இருந்த ராணி காமிக்ஸ்களை ஒருவர் மாறி ஒருவர்பகிர்ந்து வாசித்துக் கொண்டிருந்தோம்..இதனை ஒரு வகையான பண்டமாற்று என்றே கூறலாம்..

சில காமிக்ஸ்கள் சுழற்சி முறையில் நம்மை வந்தடைய வாரக் கணக்கில்கூட காத்திருக்க வேண்டி இருக்கும்.இப்படி நம்ம பசங்களெள்லாம் முகமூடி மாயவி மீது வெறிகொண்டலைந்தபோது திடீரென மாணவ முதல்வர்கள் இதனை வாசிக்கக்கூடாதெனக் கூறி பெருமளவு புத்தகங்களை நண்பர்களிடமிருந்து அள்ளிச் சென்றது இப்போதும் ஞாபகம் இருக்கிறது.. ஏன் வாசிக்கக் கூடாதெனக்கூறினார்கள் என்பதை இன்றுவரை குப்புறப் படுத்திருந்து யோசித்துப்பார்த்தாலும்எந்தக் காரணமும் புரிகிறதில்லை.பின்னர் சிலகாலம் அதனை மறைத்து வைத்து இரகசியமாக வாசித்து வந்தாலும் பழைய வெறித்தனம்.. நாட்டம் அதில் தொடரவில்லை..

பின்னர்.. எமது கல்லுரியில் விவாதம் கொடிகட்டிப்பறந்த காலம்..குமாரசுவாமி மண்டபத்தில் முன்னால் நிலத்தி உட்கார்ந்தபடி அனல் பறக்கும் விவாதங்களிற்கு கைதட்டி குதூகலித்திருந்தபோது.. நாமளும் விவாதத்தில் இறங்கினால் என்ன என ஒரு விபரீதமான நப்பாசை பிறந்தது. (எவண்டா அது பாடம் கடத்த காயாளும்உபாயங்களில் ஒன்றாகவே இவற்றிலெல்லாம் நமக்கு நாட்டம் வந்தது எண்டு அரசாங்க ரகசியங்களைப் போட்டு உடைப்பது..). ஒரு வழியாய் முட்டிமோதி நம்மளையும் விவாத அணியிலே நம்மளையும்நம்பி இறக்கிவிட்டர்கள்.

நாமளும் ஒரு மாதிரி சமுதாய நலன் அது இதென்று விவாதங்களில் ஏதோ புகுந்து கலக்கிய/கலாய்த்துக்கொண்டிருந்தபோதுதான் நிகழ்ந்தது அந்தவிபரீதம்.ஒரு நாள் இலக்கியத் தலையங்கம்.. நமக்குத்தான் பாடப்புத்தகத்திலுள்ள தமிழ் இலக்கியம் தெரிகிறதே பெரிய விசயம்.. என்ன செய்வதென்றே தெரியவில்லை. நம்மஅணியிலே முதலில் பேசிற இரண்டு பேருமே இலக்கியம் தெரிந்தவங்கள் எண்டதால ஏதோ நமக்குத் தெரிந்த கோயில்களில் சிறுவயதில் பிரசங்கங்களில் கேட்டதெல்லாம் சேர்த்து.. அதோட எப்பவும் குறைகண்டு பிடிக்கிறதில வல்லவன் எண்டிறதாலயோ என்னமோ மூண்டாவதாய் என்னை இறக்கிறவங்கள்.. ஆக எதிரணியிலே அளவுக்கதிகமாகக் குறைகண்டுபிடித்தும், ஒரு மாதிரி எனக்கு தமிழ் இலக்கியமெல்லாம் தெரியாதெண்டிற இரகசியம் வெளியில தெரியாமல் சமாளித்து ஒருமாதிரி வென்றுவிட்டோம்..ஆனா நம்ம நடுவப் பெருந்தகை இலக்கியக்கருத்துகளுக்கு அப்பால் வெட்டியாடி ஒரு மாதிரி வென்றுவிட்டீங்கள் என்று நம்ம குட்டை தனிப்பட்ட ரீதியில் உரையாடும் போது போட்டு உடைத்துவிட்டார்..இதனால் வீறுகொண்டெழிந்த நாம் தமிழ் இலக்கியத்தைக் கரைத்துக் குடிப்பதென்று முடிவெடுத்து நம்ம கல்லூரி நூலகத்தைத் துழைத்தெடுக்க ஆரம்பித்தோம். சிவகாமியின் சபதம், கடல்புறா என்று நம்மட இலக்கியப்பயணம்(?) சென்றுகொண்டிருக்கையில்தான் எமது நூலகத்திற்கு எதோ வெளிநாட்டுப் பழையமாணவர் சங்கத்தின் அன்பளிப்பு என்று பெருந்தொகையான ஆங்கிலப் புத்தகங்கள் வந்து சேர்ந்தது.

நாம தான் ஆங்கிலக் கதைப்புத்தகங்களின்ர பக்கமே தலை வைச்சுப் படுக்கிறதேயில்லையே..ஆனாலும் நம்ம பசங்க சிலபேர் கலர்கலராய் படங்களோட நம்ம முகமூடி மாயாவி போல புத்தகம் வாசிக்கிறத கண்டபோது ஆர்வமேலீட்டால் வாங்கிப் படம் பார்த்து..சிறிது சிறிதாய்.. என்ர ஆங்கிலப் புத்தகம் வாசிக்கிறதில்ல எண்டிற சபத்தத்தையே முறியடிக்கச் செய்தது தான் அந்த TinTIn..

சிறிதுகாலம் நம்ம பசங்களை வெறி கொண்டலையச் செய்தது அந்தக் பல வர்ண TinTin புத்தகங்கள்..மழைக்கும் நூலகப்பக்கம் ஒதுங்காத நம்ம பசங்கள் சிலரை நூலக அங்கத்துவம் பெறச்செய்யும் அளவிற்குநீண்டிருந்தது இந்த TinTIn வெறி.இந்தப் புத்தகங்களை எடுப்பதற்கு பலரும் முண்டையடிக்கவே..இறுதியாக சுழற்சிமுறையிலே இந்த புத்தகங்கள் வெளியில் செல்ல்லாமல் வாசிப்பதாக முடிவெடுத்துசெயலில் இறங்கினோம். அதிலும் சில குழறுபடிகள் ஏற்படவே TinTIn சில புத்தகங்களை எடுத்து வேறுஅலுமாரிகளில் யாரும் எடுத்துவிடாதவாறு ஒழித்துவைக்கத்தீர்மானித்தோம்.இதற்காக நாம் தெரிவுசெய்தது தமிழ் இலக்கியப் புத்தகங்கள் வைக்கும் அலுமாரியைத்தான்.. இப்போது நினைத்தாலும் இந்தச் சிறுபிள்ளைத்தனமான செயற்பாடுகள் சிரிப்பைத்தான் வரச் செய்கிறது..

பின்னர் செங்கையாழியான், சுஜாதா என எமது ரசனை திரும்பிவிட்டது. அந்தரசனை இப்போது இணையத்தில் ஏதாவது வாசித்தால் சரி அது தவிர எந்த புத்தகத்தையுமே வாசிப்பதில்லை என ஒடுங்கிவிட்டது.

TinTin வருகையோடு நான் கடற்புறா நாவலை இறுதிப் பாகத்தை வாசிக்காமலே விட்டுவிட்டேன் என்பது ஞாபகத்திற்கு வருகிறது..வாசிக்க வேண்டும் என்று தோன்றினாலும் அநேகமாக கதை மறந்தே போய்விட்டதால் முதலில் இருந்து தான் ஆரம்பிக்க வேண்டும்.. ஆனால் என் இயல்பான சோம்பலைக் கடந்து நானாவது அந்த புத்தகத்தையெல்லாம் தேடியெடுத்து எல்லாப் பாகத்தையும் வாசிப்பதாவது என என் உள்மனம் சிரிக்கிறது. அநேகமாக என் உள்மனம் ஜெயித்துவிடும் போலத்தான் எனக்கும் தோன்றுகின்றது. ;-)

புதிய கைத்தொலைபேசியோ, மடிக் கணனியோ வாங்க வேண்டுமா..??கவலையை விடுங்கள்..

2011-09-13T21:45:00.000+05:30

புதியதொரு கையடக்கத் தொலைபேசியோ, மடிக் கணனியோ, புகைப்படக் கருவியோ வாங்கியபின்னர் உடனடியகவே அறிமுகமாகும் புதிய மொடெலாலோ அல்லது நாம் பெருந்தொகை பணத்தைக் கொடுத்து வாங்கியவுடன் அந்தப் பொருளின் சந்தை விலையில் சடுதியாக ஏற்படும் வீழ்ச்சியாலோ கடுமையாகப் பாதிக்கப்பட்டவரா நீங்கள்..??கவலையை விடுங்கள்.

அண்மையில் உங்கள் இந்தப் பிரச்சினையைத் தீர்ப்பதை நோக்காகக் கொண்ட Decide.com என்ற தளமொன்றை அறிமுகப்படுத்தியிருக்கிறார்கள்.. குறித்த இலத்திரனியல் பொருளை நீங்கள் வாங்கலாமா இல்லை புதிய அறிமுகத்திற்காகக் காத்திருத்தல் உசிதமானதா..விலையிலேற்படக்கூடிய மாற்றங்களிற்கான எதிர்வு கூறல்கள் என உங்களிற்கு ஆலோசனை வழங்கக் கூடியவாறு இந்தத் தளத்தை வடிவமைத்திருக்கிறார்கள்.

ஒவ்வொரு நாளும் சராசரியாக ஆறு புதிய மடிக்கணனி வகைகள்,ஒரு புதிய வகை புகைப்படக் கருவி ,ஒரு புதிய வகை தொலைக்கட்ட்சியென புத்திது புதிதாக அறிமுமாகிக் கொண்டிருக்கும் இந்தக் காலத்தில் நுகர்வோரிற்கு இந்தத் தளம் பெருந்துணையாக இருக்கும்.ஆனால் இத் தளம் பிரபலமானால் இவர்களது விலை எதிர்வு கூறல்கள் பொருட்களின் விலையை, நிரம்பலை செயற்கையாக நிர்ணயிக்கக்கூடிய துர்ப்பாக்கிய நிலையை ஏற்படுத்திவிடும் என விமர்சிப்பவர்களும் உள்ளார்கள்

.
எது எவ்வாறானாலும் புதிய மொடல்களின் அறிமுகம் பற்றிப் பெரிதாக உடனடியாகத் தெரிந்து கொள்ள முடியாதவர்கள், புதியதொரு இலத்திரனியல் உபகரணத்தினை வாங்கமுற்படுகையில் இந்தத் தளத்தினது எதிர்வுகூறலையும் ஒரு முறை கவனித்துத் தங்கள் தீர்மானங்களை மேற்கொள்வதன் மூலம் ஏற்படக் கூடிய ஏமாற்றத்தினைத் தவிர்த்துக்கொள்ளலாம்..

மேலதிக விரிவான விபரங்களிற்கு இங்கே சொடுக்குங்கள்
tech crunch பதிவிற்கு..

இலங்கை அணி.. கவனஞ் செலுத்த வேண்டியவை..

2011-08-20T22:36:00.003+05:30

இன்று இடம்பெற்ற தொடரைத் தீர்மானிக்கும் முக்கிய கிறிக்கெற் போட்டியில் இலங்கை அணி தோல்வியைத் தழுவி இந்திய அணிக்கு தாங்கள் எந்த வகையிலும் சளைத்தவர்கள் இல்லை என நிரூபித்து இந்திய அணி விசிறிகளை சீண்டிய எங்களைப் போன்றவர்களிற்கு எல்லாம் மரண அடி வாங்கித் தந்துள்ளது. அடுத்த போட்டியிலாவது இலங்கை அணி வென்று மீண்டு எங்களைப் போன்றவர்களை பழையபடி சீண்டிப்பார்க்கும் போமிற்கு திரும்பச் செய்யுமோ என் நாமே குப்புறப் படுத்துச் சிந்தித்திருந்த வேளையில் கிறிக்கெற் பதிவெழுதாத நீயெல்லாம் ஒரு பதிவரா என நண்பனொருவன் வெந்த புண்ணில் வேல் பாச்சிவிட்டான்.

இலங்கை அணிக்கு ஆலோசனைகளை வழங்கி அணியை அடுத்த போட்டியிலாவது வெல்லச் செய்ய எதற்கும் சளைக்காமல் இலங்கை அணிக்காக வாதாடும் அமரேசைத் தொடர்பு கொள்வோமென்று பார்த்தால் அவர் தொடர்பு வலையமைப்புக்கு இப்பாலோ அப்பாலோ சென்றுவிட்டதால் ..இதோ நானே களத்தில் இறங்கி விட்டேன். இதோ எனது ஆலோசனைகள்.

இலங்கை அணி துடுப்பாட்டத்தில் ஓட்டங்களைக் குவிக்க முடியாமல் இப்போதெல்லாம் தடுமாறுவதால் இன்னும் இரண்டு துடுப்பாட்ட வீரர்களை அணியிலிருந்து தூக்கிவிட்டு பந்துவீச்சாளர்கள் இருவரை அணியில் இணைக்கலாம்.தொடரை ஏற்கனவே இழந்து விட்டதால் அடுத்த போட்டியில் உலகில் மிக நீண்ட வால் (அது தாங்க tail end) கொண்ட அணியென்ற கிண்ணஸ் சாதனையை இலக்கு வைத்து பத்துப் பந்து வீச்சாளர்களும் ஒரு விக்கெட் காப்பாளருமாக ஒரு அணியைத் தெரிவு செய்யலாம். முடிந்தால் இந்திய அணித் தலைவர் டோணி போலப் பகுதி நேரமாகப் பந்து வீசக்கூடிய விக்கெட் காப்பாளர் ஒருவரை இணைப்பது அணிக்கு மேலும் வலுச் சேர்த்து சாதனையை மேலும் வலுவாக்கும்.

எத்தனை முழுநேரப் பந்து வீச்சாளர்கள் அணியிலிருந்தாலும் பகுதி நேரப் பந்து வீச்சாளர்களைக் கொண்டு தான் ஆரம்ப பந்துப் பரிமாற்றங்களை வீசி முடிக்கவேண்டும். முடிந்தால் லசித் மலிங்கவிற்கு ஓவரே கொடுக்காமல் அதனையும் பகுதி நேரப் பந்து வீச்சாளர்களைக் கொண்டு வீசி முடிக்கச் செய்யலாம்.

எப்போதோ ஒரு உலகக் கிண்ணத் தொடரில் சில ஐம்பதுகளை அடித்ததோடு மட்டுமல்லாமல் அணி தோற்கும் போதெல்லாம் ஐம்பது அடித்து சாதனை படைக்கும் இலங்கை அணியின் நம்பிக்கை நட்சத்திரம் சாமர சில்வாவை தலைவராக நியமித்துப் அணியைத் தூக்கி நிறுத்துவதோடு மைந்தன் சிவா போன்ற விமர்சகர்களிற்குத் தகுந்த பதிலடி கொடுக்கலாம். அதுவும் அவரைத் துடுப்பாட்ட வீரராகவே கணிக்க முடியாது எனக் கருத்துக் கூறும் கன்கோன் போன்றவர்களை 4 துடுப்பாளர்+5 பந்து வீச்சாளர் + அணித்தலைவர் எனக் கருத்துக் கூறச் செய்யலாம்.

எல்லாவற்றிற்கும் மேலாக ”சுழற்றக் காத்திருக்கும் இலங்கை ” எனப் போட்டி தொடங்க முதலே ஆரூடம் கூறி எவ்வளவு அடி வாங்கினாலும் சளைக்காத எங்கள் விக்கிரமாதித்தன் லோசன் அண்ணாவின் வலைப்பூவை இலங்கை தொடர்பான போட்டித் தொடர்கள் ஆரம்பிக்க முதலே ஏதாவது தொழினுட்ப முறைகளைக் கையாண்டு உத்தியோகப்பற்றற்ற முறையிலே முடக்க வேண்டும்.

7 தடவை துடுப்பாட்டப் போட்டியைப் பார்க்கப் போய் சகல தடவையும் இலங்கை அணியைத் தோற்கடிக்கச் செய்த அஷ்வின் போன்றவர்களையெல்லாம் ஏதாவது தடைச்சட்டத்தில் தூக்கி உள்ளே போட்டு அடுத்த போட்டிக்கு மைதானப் பக்கமே வரவிடாமல் செய்து இலங்கையின் வெற்றியை உறுதிப்படுத்திக் கொள்ளலாம்.

யாரது..?? எனது பாதுகாப்பை உறுதிப்படுத்தச் சொல்லி மகஜர் தாயாரிப்பது..!!
பி.கு: யாவும் கலப்படமற்ற கற்பனை

அமெரிக்கா.. கருத்து.. மாற்றுக் கருத்து..

2011-08-20T13:20:00.002+05:30

உண்மையிலேயே நாமெல்லாம் எமக்கு அருகில், எம்மைச் சூழ எம்மையெல்லாம் நேரடியாகவோ மறைமுகமாகவோ பாதிக்கின்ற விடயங்களைப் பற்றியெல்லாம் அடிப்படையிலிருந்து அறிந்து வைத்திருக்கின்றோமா என்பதில் எனக்கு நீண்டகாலமாகவே ஒரு சந்தேகம்.

முதலில் இந்த வீடியோவை ஒரு முறை பாருங்கள்.அவர்களது விடைகளையும் கருத்துக்களையும் அவதானமாகக் கவனியுங்கள்..

சிரிப்பை அடக்கமுடியாதவர்கள் நன்றாகவே சிரித்துவிட்டு விடயத்திற்கு வாருங்கள்.

எங்களில் பலரும் இப்படியானவர்களாக இருப்பது மறுக்க முடியாத உண்மையே.

Facebook ல் தங்கள் கருத்துக்களைத் தெரிவிக்க முற்பட்டுத் தங்களை வெளிச்சம் போட்டுக் காட்டிவிடுபவர்கள் பலரை நீங்கள் கண்டிருப்பீர்கள். இந்த வீடியோவை பார்த்ததிலிருந்து எங்கள் நண்பர் குழுவிடையே வழமை போலவே ஆரம்பித்த விவாதமொன்று நீண்டு ..வழமை போலவே முடிவேதும் இல்லாமல் முடிவடைந்துவிட்டது.

அந்த விவாதத்தின் அடிப்படைச் சந்தேகங்கள் இது தான்..

எதற்கெடுத்தாலும் தங்கள் கருத்தைக் குறிப்பிடுபவர்கள் இருக்கிறார்களே. அவர்கள் எத்தனை சதவீதமானவர்கள் விடயத்தின் ஆழத்தை புரிந்து கருத்துத் தெரிவிக்கிறார்கள்..? ?
உண்மையிலேயே எல்லா விடயத்திலும் ஒருவனிற்கு சொந்தக் கருத்து இருக்க வேண்டுமா..?? சில விடயங்களில் தனக்கென சொந்தக்கருத்தெதுவும் இல்லாமல் இருப்பதில் தவறேதுமிருக்கிறதா..??
மாற்றுக் கருத்து..மாற்றுக் கருத்து என்கிறார்களே.. அப்படி மாற்றுக் கருத்துக் கூறுபவர்களில் ஏறக்குறைய சகலருமே ஏன் எல்லாக்கருத்துக்குமே மாற்றுக் கருத்துக் கூறுகிறார்கள்..??
எது கருத்து ..??எது மாற்றுக்கருத்து..?? அநேகமானவர்கள் தெரிவிப்பதற்கு மாறாகத் தெரிவிப்பது தானா மாற்றுக்கருத்து..?? ;-)

யாரது..??இப்பவே கண்ணைக் கட்டுதே என்பது..
சரி சரி .. பிழைத்துப் போங்கள்.

புற்றுநோய்க்கெதிரானதொரு பாரிய போர்.. தொடர்கின்றது..

2011-08-02T20:52:00.001+05:30

கடந்த மாதம் முதலாம் திகதி தேவேந்திர முனையிலிருந்து ஆரம்பிக்கப்பட்ட "பாதை" எனப் பெயரிடப்பட்ட பிரமாண்ட நடைபயணம் இருபத்தேழாம் திகதி பருத்தித்துறை முனையை வந்தடைந்தது.

குறைந்தது இரண்டு மில்லியன் அமெரிக்க டொலர்களை திரட்டுவதன் மூலம் யாழ். போதனா வைத்தியசாலையில் சிறுவர்களுக்கான புற்றுநோய் சிகிச்சைப் பிரிவை உருவாக்குவதே நடைபயணத்தின் பிரதான நோக்கமாக அமைந்திருந்தது. ஆனாலும் ஏறக்குறைய 1.3 மில்லியன் அமெரிக்க டொலர்களையே அவர்களால் இதுவரை திரட்ட முடிந்துள்ளது. எனவே, உரிய இலக்கினை அடைவதற்காக மேலும் நன்கொடைகள் எதிபார்க்கப்படுகிறன. இறுதி நாளன்று இலங்கை கிரிக்கெட் அணி வீரர் மஹேல ஜெயவர்தன அவர்களால் தெல்லிப்பளையில் புதிய கட்டடத்திற்கான அத்திவாரம் இடப்பட்டது.

இது தொடர்பான மேலதிக விபரங்களையும், நன்கொடை வழங்குவதற்கான அறிவுறுத்தல்களையும் பெறுவதற்கு இங்கே சொடுக்குங்கள்.

இது பற்றிய எனது முன்னைய பதிவிற்கு இங்கே சொடுக்குங்கள்.

உத்தியோகபூர்வ இணைய முகவரி .www.trailsl.com

தெய்வத்திருமகள்- அருமையான பாசப் பிணைப்பு

2011-07-15T21:19:00.003+05:30

யாழ் இந்துக் கல்லூரி இளைஞர் வட்டத்தின் ஏற்பாட்டில் ஒழுங்கு செய்யப்பட்ட தெய்வத்திருமகள் சிறப்புக்காட்சி நேற்றிரவு பார்க்கக் கிடைத்தது .படம் முடிவடைகையில் நள்ளிரவு தாண்டியிருந்தபோதும் எந்தச் சலிப்புமில்லாமல் மனது முழுவதும் இனம்புரியாத ஓர் இதமான உணர்வு நிரம்பியிருந்தது. படக் காட்சி ஒழுங்கமைப்பில் நானும் பங்குபற்றியிருந்ததால் பல நண்பர்களோடு உரையாடி படத்தைப்பற்றிய கருத்துகளை அறிய முற்படுகையில் அனைவருமே திருப்ப்தியாயிருந்தமை இரட்டிப்பு சந்தோசமே..

இயக்குனர் விஜய் மீது கிரீடம் படத்திலிருந்தே ஒர் ஈர்ப்பு இருந்ததும், விக்ரமை தெய்வத்திருமகள் ரெயிலரரில் பார்த்ததிலிருந்தே எப்படியாவது இந்தப் படத்தை பார்த்துவிடவேண்டும் என்று தீர்மாந்த்திருந்தேன்.மன நலம் குன்றிய தந்தையின் வேடம்.. விக்ரம் யாவரும் எதிர்பார்த்தது போலவே நடித்துக் கலக்கியுள்ளார்.

விக்ரம், குட்டி மகள் நிலா, நிலாவின் தாயின் தந்தை மூவரிற்குமிடையிலான பாசப் போரட்டம் தான் படம்..அதிலும் விக்க்ரமிற்கே போட்டி போட்டு நடித்துக் கலக்கியுள்ள அந்தக் குட்டி தேவதை சரா.. எவ்வளவு நெகிழ்ந்து பாராட்டினாலும் தகும்.

மிருதுவான நெகிழ்வான கதையோட்டம்.. மீண்டும் இயக்குனர் விஜய் ஜமாய்த்துள்ளார்.ஜி.வி பிரகாஸ் இசையால் உணர்வுபூர்வமாக எல்லாவிதமான பாசங்களையும் பின்னணியில் வடித்துள்ளார்.எந்தவிடத்திலும் உறுத்தாத மிகைப்படாத இசை.. ஜிவி மற்றும் விஜய் கூட்டணி மீண்டும் கலக்கியுள்ளது.கதையோட்டத்தினூடேயே பயணிக்கும் பாடல்கள் படத்தினது மற்றுமோர் பலம்.ஏனோ பாடலாகக் கேட்கையில் என்னைக் கவர்ந்திருந்த விழிகளில் ஒரு பாடல் படத்தில் கதையோட்டத்தைக் குலைப்பதுபோல் ஓர் உணர்வு..(எனக்கு மட்டுந்தானா.. ?? ) ஒளிப்பதிவாளர் நீரவ் ஷா காட்சிகளைக் குளிர்மையாகக் காட்டி அசத்துவதில் தான் வல்லவன் என்பதை மீண்டும் நிரூபித்திருக்கிறார்.

நாசர்,அனுஸ்கா,எம்.எஸ் பாஷ்கர், விழிகளால் கலக்கும் அந்தக் குட்டிப் பயல் என பலர் போட்டிபோட்டு நடித்திருக்கிறார்கள்..குட்டி தேவதை நிலா..மனதை விட்டு அகல மறுக்கிறாள்.இவ்வளவு சிறிய வயதில் அருமையான நடிப்பு..முகபாவனை.காட்சி காட்சியாகச் சிலாகிக்கலாம் .ஆனாலும் நீங்கள் திரைப்ப்டத்தைப் பார்க்கையில் உங்கள் உணர்வோட்டத்தை அவை சிதைத்துவிடலாம் என அஞ்சி அவற்றைத் தவிர்த்துவிடுகிறேன்.

என் உலக சினிமா ரசிக நண்பனொருவன் இப்படத்தை I Am Sam படத்தின் தழுவலென நேற்றே திரையரங்கில் கூறிக் குறைப்பட்டான். எதுவாயிருந்தாலும் என்னைப் போல் அப்படத்தைப் பார்வையிடாத இலட்சக் கணக்கான நபர்களிற்கு அது எந்தப் பாதிப்பையும் தரப்போவதில்லைத் தானே.. J ..ஆனாலும் அந்தப் படத்தையும் எங்காவது தேடிப் பார்த்துவிட வேண்டுமென முடிவெடுத்திருக்கின்றேன்.

அண்மைக்காலத்தில் திரையரங்கிற்குச் சென்று சொந்தச் செலவில் சூனியம் வைத்துவிட்டதாக உணர்ந்த பலரும் துணிந்து இத் திரைப்படத்திற்குச் சென்று உங்களது அந்த பிறவிப் பிணியைப் ;-) போக்கிக்கொள்ளலாம்.துணிந்து செல்லுங்கள்.

விஞ்ஞானி சபேசன் மனம் திறக்கிறார்..

2011-07-10T12:09:00.000+05:30

அண்மைக்காலமாக எங்கள் Facebook பக்கமெங்கும் பரபரப்பாக வியாபித்திருக்கும் பெயர் தான் சபேசன் சிதம்பரநாதன்.. எங்கள் காலத்தில் எங்கள் கல்லூரியில் கற்றவர் என நாமெல்லாம் பெருமைப்பட்டுக் கொள்ள வழிவகுத்தவர்..

மலிவு விலையில் ஒருவர் இருக்கும் இடத்தை உடனடியாக அறிந்துகொள்ளக்கூடியதொரு பொறிமுறையை கண்டுபிடித்ததன்மூலம் உலகின் கவனத்தைத் தன்பக்கம் திருப்பிய ..வயதில் இன்னும் இருபதுகளிலேயேயுள்ள இளைஞன்.. விமான நிறுவனங்கள் பலவும் தங்கள் செலவை மில்லியன் கணக்கில் குறைத்துக்கொள்ள வழிவகுக்கக்கூடியது அவரது இந்தக் கண்டுபிடிப்பு..

அண்மையில் என் நண்பனொருவனுடன் உரையாடுகையில் சபேசன் சாவகச்சேரி மற்றும் யாழ் இந்துவின் மைந்தன், யாழ்ப்பாணத்தைச் சேர்ந்தவன், ஈழத்தமிழன் என்பதற்கப்பால் அவரது கண்டுபிடிப்பு என்ன என்பது பற்றி தமிழில் எங்கள் ஊடகங்களும்,நாங்களும் வாய்திறக்கின்றோமில்லையே என ஆதங்கப்பட்டுக்கொண்டான்.

youtubeல் இன்று உலாவருகையில் அவரது சுவாரஸ்யமான தமிழ் தொலைக்காட்சி உரையாடல் ஒன்று சிக்கியது.தனது ஆராய்ச்சி, தனது இளமைக்காலம், கற்ற கல்லூரிகள், கற்பித்த ஆசிரியர்கள்(வாத்திமார் ;-) )பற்றியெல்லாம் மனந்திறந்து சுவாரஸ்யமாக உரையாடியிருக்கிறார்.

நேர்காணலின் எஞ்சிய பகுதிகளைப் பார்வையிட
பகுதி 2, பகுதி 3, பகுதி 4, பகுதி 5

புள்ளிகள் தானா "உண்மை "..??

2011-06-20T21:29:00.000+05:30

உண்மை என்றால் என்ன ? உண்மை என்று உலகில் ஏதாவது ஒன்று உள்ளதா? உண்மையை தேடி நாம் அலைகிறோமா? .. அல்லது சங்கரரின் மாயா வாதம் போல எல்லாம் பொய் தானா?? but பொய் என்று ஒன்று இருக்க வேண்டுமானால் உண்மை என்று ஒன்று இருந்தே ஆக வேண்டும் ... becauseதற்போதைய அறிவுக்கு எட்டிய வகையில் எல்லாம் "சார்ந்தவையே".. (ஐன்ஸ்டீனின் கொள்கை இன்னும் முறியடிக்கப் படவில்லை .. ஆகவே அதை சரியெனக் கொள்வோம் )..

கணித ரீதியில் உள்ள உண்மைகள் ...தூய கணிதத்திலே சிலவற்றை "வெளிப்படை உண்மைகள்" என்று சொல்வோம்.... அதைவிட 1 +2 =3 .. போன்றவைகளும் கணித ரீதியில் உண்மைகள் .. ஆனால் இப்படி யோசித்துப் பாருங்கள் .. ஒரு நாட்டில் எண் வரிசையை 2,4,5,3,9,7,8,1,6.. இவ்வாறு சிறிய வயதிலிருந்து சொல்லிக் கொடுக்கிறார்கள் என்று வைத்துக் கொள்வோம் ... அதாவது எங்களது 2 அவர்களது 1 ...எங்களது 4 அவர்களது 2 ... எங்களது 5 அவர்களது 3 ... so , அவர்களிடம் கேட்டால் 2+4=5 என்று தான் சொல்வார் ... எங்களுக்குப் பிழையாகத் தோன்றும் ஒன்று அவர்களைப் பொறுத்தவரை சரி.. இந்த எளிய உதாரணம் மூலம் நாம் ஒரு பெரிய தத்துவத்தை எளிதில் விளங்கி கொள்ளலாம் .. அதாவது ....

“ உண்மைகள் எல்லாவற்றுக்கும் ஒரு Frame உண்டு... அந்த Frame இல் மட்டுமே .. அந்த உண்மை செல்லுபடியாகும் ... அதற்று வெளியே அது பொய் ... அல்லது ஏற்றுக் கொள்ளப்பட முடியாதது ....”

எனக்கு அவள் பச்சை ... உனக்கு அவள் மஞ்சள் ....

ஒரு இலையை எடுத்துக் கொள்ளுங்கள் ... சின்ன வயதிலிருந்தே அம்மா முதல் எல்லாரும் அதை பார்த்து பச்சை நிறம் என்று கூறியிருப்பார்.. so எனது மூளையில் உள்ள operating system இவ்வாறு codes ஐ எழுதிக் கொள்ளும் ... " இப்ப நீ பாக்கிறது மாதிரி ஒரு நிறத்துக்குப் பெயர் தான் பச்சை .." (இப்பொழுது கண்ணில் விழும் போல ஒரு விழுந்தால் அதை பச்சை என்று உணர் )

ஆனால் அந்த பச்சைகுரிய தன்மை எனது மனதினாலேயே தீர்மானிக்கப் படும் ... அந்த தன்மை ஆளாளுக்கு வேறுபாடும் .. அதாவது பச்சை என்று நினைக்கும் போது உடனே உங்கள் மனதில் தோன்றும் நிறம் இன்னொருவர் சிவப்பு என்று நினைக்கும் போது அவர் மனதில் தோன்றும் நிறத்துக்கு சமமாக இருக்கலாம் ...

கணணி அறிவுள்ளவர்களுக்கு இதை

இவ்வாறு விளக்கலாம் ....

ஆக இருவர் ஒரு பொருளை பாக்கிறார்கள்... இருவரும் அதன் நிறத்தை சரியாகச் சொல்கிறார்கள் .... ஆனால் உண்மையில் அவர்கள் இருவருக்குள்ளும் நடந்த processing வேறு வேறு .... இதை உணர்ந்து கொள்வது கடினம் ... சிறிது ஆழ்ந்து சிந்தித்தல் விளங்கும் .... இவ்வாறே "ருசி" களும் ... எல்லோரும் "தேன்" குடிக்கிறோம் .. உடனே "இனிக்குது" என்கிறோம் ... எமக்கு தேன் தரும் ருசிக்குப் பெயர் இனிப்பு என்பது சின்ன வயதிலிருந்து சொல்லித்தரப் பட்டுள்ளது .... இந்த தேன் தரும் ருசியை நான் உணரும் உணர்ச்சி ஆனது கத்தரிக்காய் தரும் ருசியை நீங்கள் உணரும் உணர்ச்சிக்கு சமமாக இருக்கலாம் ...

உண்மைகள் பற்றிய இப்படியான விடயங்கள் தொடரும் ....

ஆம்!! கேள்விக் குறிக்கு அடியில் ஏன் புள்ளடி வந்திருக்கும் ..?? கையொப்பங்களை ஏன் அநேகமானோர் புள்ளடி உடன் தான் முடிக்கின்றனர் ??.... அநேகமானோர் சிறு கோடு ஒன்று வெறுங்கையால் கீறும் போது முடிவில் ஏன் டக் எண்டு ஒரு குத்து போடுகிறார்கள் .... ???ஆம் இவை அனைத்தும் தன்னை அறியாமல் போடப்படும் குத்துக்கள் .... அவ்வாறே எங்களை அறியாமல் எங்களுக்கு தெரியாமல் "உண்மை" ஒன்று உண்டு ... அது புள்ளி போலத்தான் இருக்க வேண்டும் ... இருந்துகொண்டிருக்கிறது ....

மீள்பதிவு ;-)

புற்றுநோய்க்கெதிரானதொரு பாரிய போர்..

2011-06-13T20:39:00.002+05:30

அண்மைக்காலமாக யாழ்குடாநாடு அடங்கலாக இலங்கையின் வடக்குக் கிழக்கு பகுதிகளில் புற்றுநோயால் பாதிக்கப்படுவோர் தொகை துரித கதியில் அதிகரித்தவண்னமுள்ளது. செயற்கை அனர்த்தங்களாலான உயிர்ப்பலி இப்போது இப்பகுதிகளில் குறைவடைந்துள்ள போதும் மறுபுறம் புற்று நோயால் பீடிக்கப்பட்டு உயிரிழப்போர் தொகை அதிகரித்திருப்பது பலராலும் கவலையுடன் நோக்கப்பட்டு வருகின்றது.அதிலும் பலர் சிறுவயதிலேயே இப் பாதிப்பை எதிர்கொள்வது தான் பெருஞ் சோகம்.

இப்போது இலங்கையில் இலவச புற்றுநோய்ச் சிகிச்சைக்கான பெருமளவு வசதிகளுடனான வைத்தியசாலை மகரகம பகுதியிலே அமைந்துள்ளது.தொலை தூரத்திலுள்ள இவ் வைத்தியசாலைக்கு வருகைதர அப் பகுதி மக்கள் பலத்த இடர்பாடுகளைச் சந்தித்தவண்ணமுள்ளனர்.இவற்றைத் தவிர்க்க யாழ்ப்பாணம் போதனா வைத்தியசாலையில் சிறுவர்களிற்கான புற்றுநோய் சிகிச்சைக்கென சகல வசதிகளுடனான ஒரு பிரிவினை நிறுவும் நோக்கத்திற்க்காக colours of courage trust அமைப்பினால் இரண்டு மில்லியன் அமெரிக்க டொலர்கள் திரட்டும் பாரியதொரு முன்னெடுப்பு ஆரம்பிக்கப்பட்டுள்ளது.

இதன் ஒரு கட்டமாக தேவேந்திரமுனை தொடக்கம் பருத்தித்துறை வரையிலான 670 Km தூர பாரிய நடைப்பயணமொன்று எதிர்வரும் ஜூலை முதலாம் திகதிமுதல் ஆரம்பிக்கப்படவுள்ளது. இதற்கு ஒத்துழைக்க இலங்கைக் கிறிக்கெற் அணித்தலைவர் டில்சான், மகெல ஜெயவர்த்தன போன்றோர் முன்வந்துள்ளது குறிப்பிடத்தக்கது.

புற்று நோய்க்கு எதிரான இப் பாரிய போராட்டத்திற்கு நீங்களும் நிதி ரீதியாகவோ அல்லது ஏனைய வழிகளிலோ பங்களிக்க விரும்பினால் விபரங்களிற்காக இங்கே சொடுக்குங்கள்

உத்தியோகபூர்வ இணயத்தள முகவரி:- Trail

twitter:- TrailSL

என்னைக் கவர்ந்த சங்கர் மகாதேவன் ..

2011-05-29T22:43:00.004+05:30

யாழ் இந்துவில் நான் ஒன்பதாம் ஆண்டு கற்றுக் கொண்டிருந்த காலம்.ஏதோவொரு நாடகப் பயிற்சியிலீடுபட்டுக் கொண்டிருந்தபோது..

உடனே நான் ஏதோ பெரிய நடிகன் என்றெல்லாம் முடிவு எடுத்துவிடக்கூடாது.. பாடவேளைகளில் உத்தியோகபூர்வமாக வகுப்பிலிருக்காமல்

கடத்துவதற்காக நாங்கள் தெரிவு செய்திருந்தவோர் உத்தி தான் இந்த நாடகங்களில் நடிப்பது..நாடகப் பயிற்சி முடிவடைந்தாலும் பின்னர் நாங்கள்

வகுப்பறைப் பக்கம் எட்டிப் பார்ப்பதேயில்லை என்பது வேறு விடயம்.. இவ்வாறு கிடைக்கும் இடை வேளைகளில் ஒரே கூத்தும் கும்மாளமும் தான்..

இந்த வேளைகளில் நாம் ஆரம்பித்தது தான் உடைந்துபோன கதிரை மேசைகளின் பலகைகளை முறித்தெடுத்து துடுப்பாகவும் டஸ்ரரை பந்தாகவும் கொண்டு கிறிக்கெற் அடிப்பது..இந்தப் போட்டிகளைக் கூட சில சமயங்களில் வாழ்வா சாவா போட்டிகளாக நாம் உத்வேகம் கொண்டு ஆடியது இப்போது நினைத்தால் சிரிப்புத் தான் வரும்.. பல சமயங்களில் புண்ணியலிங்கம் சேரிடம் சிக்கி எல்லோரும் செய்வது போல விபூதி வேட தாரியாகச் சென்று தப்பித்தது பலமுறை.. இப்படியான எங்கள் குழுவில் எல்லோரும் பாட்டுப்

பாடக் கூடியவர்கள்..அதற்கேற்ற குரல் வளமும் உடையவர்கள்..ஹிஹி..என்னைத் தவிர..இடையிடையே சினிமாப் பாடல்களைப் பாடிக் கும்மாளமடிப்பதும் நடக்கும்..

இவ்வாறான ஒரு கும்மாளத்தின்போது என் நண்பனொருவனால் அறிமுகப்படுத்தப்பட்டவர் தான் சங்கர் மகாதேவன்..சந்தணத் தென்றலே பாடல் என்று நினைக்கிறேன்.அன்றிலிருந்து சங்கர் மகாதேவனின் பாடல்களைத் தேடிக் கேட்கத் தொடங்கினேன்.அவரது குரலில் அப்படி ஏதோவொரு ஈர்ப்பு இருக்கிறது.அதிலும் உச்ச வீச்செல்லை கொண்ட

கிறங்கடிக்கும் அவரது குரலும் இதற்கு ஒரு காரணமாயிருக்கலாம்.. அனுபவித்து தமிழில் பாடல்களைப் பாடும் பாடகர்களில் பிரதானமாக இவரையும் நான் குறிப்பிட்டுச் சொல்வேன்.மும்பையில் பிறந்த தமிழ் பேசும் கேரள அந்தணக் குடும்பப் பின்ணணியும் இதற்கு சங்கர் மகாதேவனிற்குத் துணை புரிந்திருக்கலாம்.

இசைப்புயல் ரகுமானின் இசையில் சங்கர் மகாதேவன் சங்கமம் பாடிய ”வராகை நதிக்கரையோரம்.. “ எனும் மெலிதான ஹிந்துஸ்தானி கலந்த கிராமியப் பாடல் மெட்டுக் கொண்ட இந்தப் பாடல் மூலம் முதல் தமிழ் இசை ரசிகர்களைத் திரும்பிப்பார்க்கச் செய்தார். ஹிந்துஸ்தானி, கர்நாடக இசை என்பவற்றில் இவருக்குள்ள தேர்ச்சியை இவரது பாடல்களிலே நாங்கள் இனங்கண்டு கொள்ளலாம்.

தொடர்ந்து இவரது உச்சஸ்தாயி குரலை இனங்கண்டு இசைப்புயல் கண்டுகொண்டேன் கண்டுகொண்டேன் படத்தில் வழங்கிய பாடல் தான் இல்லையென்று சொல்ல ஒருகணம் போதும்..அந்தப் பாடலில் உணர்ந்து அனுபவித்து உச்சவீச்சுக்கு இடையிடையே சென்று தமிழ் இசை ரசிகர்களை வசீகரித்தார் சங்கர் மகாதேவன்.. அந்த ஆண்டிற்கான சிறந்த பாடகரிற்கான தேசிய விருதையும் சங்கர் மகாதேவனிற்குத் தேடிக்கொடுத்தது இந்தப் பாடல்.

இசைப்புயல் தவிர யுவன் சங்கர் ராஜா சங்கர் மகாதேவனை மிகச் சரியாகப் பயன்படுத்திக் கொண்ட பாடல் தான் என் அன்பே..என் அன்பே.. இயக்குனர் அமீரின் முதல் படமான மோனம் பேசியதே திரைப்படத்திற்காக பாடிய பாடல் தான் அது..ஓ சகி .. பிரிய சகி யென வேறு வேறான வீச்செல்லைகளுடன் இந்தப் பாடலில் உருகியிருந்தார் சங்கர் மகாதேவன்.. யுவனும் அதற்கேற்ற மெலிதான வாத்திய இசைகொண்ட மெலடியாக அந்தப் பாடலை உருவாக்கியிருந்தார்.

இசையமைப்பாளர் ஹரிஸ் ஜெயராஜ் சங்கர் மகாதேவனை உபயோகித்துக் கலக்கிய பாடல் தான் சங்கரின் அந்நியன் படத்தில் இடம்பெற்ற குமாரி.. வித்தியாசமான உச்சரிப்புடன் அந்தப் பாடலைப் பாடிக் கலக்கியிருப்பார் சங்கர் மகாதேவன்..இசையமைப்பாளர் வித்தியாசாகர் சங்கர் மகாதேவனுடன் இணைந்து திருமலை படத்திற்காகப் பாடிய நீயா பேசியது.. பாடலைக் குறிப்பிடலாம்.இவ்வாறு சங்கர் மகாதேவன் தமிழில் கலக்கிய பாடல்களைக் கூறிக்கொண்டே போகலாம். சங்கர் மகாதேவனின் உச்சஸ்தாயி குரலை நடிகர்களின் அறிமுகப் பாடல்களிற்கு உபயோகிக்கும் ஒரு பாணியே ஒரு காலத்தில் தமிழ் சினிமாவிலிருந்தது.

இன்று பல ஹிந்தித் திரைப்படங்களிற்கு இசையமைத்துக் கொண்டிருக்கும் சங்கர் மகாதேவன் தமிழில் இசையமைப்பாளராக அறிமுகமாகிய படம் தான் கமலின் ஆளவந்தான்..துரதிஸ்டவசமாக அந்தப் படத்தின் தோல்வி அவரை தமிழில் இசையமைப்பாளராகத் தொடர அனுமதிக்கவில்லைப் போலும்...

2010இல் சங்கர் மகாதேவன் அக்கடமி எனும் பெயரில் சங்கீத அக்கடமியை ஆரம்பித்து ஹிந்துஸ்தானி, கர்நாடக இசைப் பயிற்சி உட்பட திரையிசைப்பாடலிற்கன பயிற்சியை வழங்கி வருகிறார்.சங்கர் மகாதேவனின் பிரபல அல்பம் Breathless..அதிலே முழுமையான பாடலையே மூச்சுவிடாமல் பாடுவதுபோன்று ஒலிச்சேர்க்கை சேர்த்திருந்தார்கள் .

அந்தப் பாடல் இங்கே கேட்கலாம்..

ராஜ் ராஜரட்ணம்..சிக்கியது எவ்வாறு ..??

2011-05-24T22:02:00.000+05:30

ராஜ் ராஜரட்ணம்..
அண்மைக்காலமாக ஊடகங்களில் அதிகம் உபயோகிக்கப்பட்ட பெயர்களில் ஒன்று.
Gallean Group இன் நிறுவுனர்..
இலங்கையில் பிறந்து நியூஜோர்க்கில் வாழ்ந்தவொரு தமிழர் ...
பங்குச் சந்தை வியாபாரத்தின் மூலம் அமெரிக்காவின் முன்ணணி பணக்காரர்களில் ஒருவராகத் தன்னை நிலை நிறுத்திக் கொண்டவர்....

87 000 அமெரிக்க டொலர்களை அமெரிக்க அதிபர் ஒபாமாவின் தேர்தல் பிரசாரத்திற்காக வழங்கியவர்.ஒரு மில்லியன் அமெரிக்க டொலர்களை முன்ணாள் போராளிகளின் புனர்வாழ்விற்காக ஒதுக்க முன்வந்தவர்.இலங்கையில் 2004 சுனாமி அன்ர்த்தத்தின் பின்னான புனருத்தாரண பணிகளிற்கு உதவியதோடு மட்டுமல்லாமல் மிதிவெடியகற்றும் பணிகளிற்குப் பெருமளவில் உதவியவர்..

ஒக்ரோப்ர் 2009 காலப்பகுதியில் FBI யினால் இரகசியமான முறையில் IBM போன்ற பல்வேறு பிரபல பொதுக் கம்ம்பனிகளிலுள்ள தனது நண்பர்கள் அல்லது கைக்கூலிகள் மூலம் அக் கம்பனிகளின் சாதாரண வெளி நபர்களிற்குத் தெரியாத பெறுமதியான உள்வீட்டு தகவல்களைப் பெற்று அதற்கேற்ப பங்குச் சந்தை வியாபாரத்தில் ஈடுபட்டு பெரும் இலாபமீட்டினார் என்று குற்றச்சாட்டப்பட்டுக் கைது செய்யப்பட்டார். பின்னர் பிணையில் வெளியேவந்து தன் மீதன குற்றச்சாட்டிலிருந்து வெளிவரக் கடுமையாகப் போராடினார் ராஜ்.

இந்த மாதம் 11ந் திகதியளவில் அவருக்கெதிராக 14 குற்றச்சாட்டுக்கள் அமெரிக்க நீதி மன்றத்தில் நிரூபிக்கப்பட்டு ஆயுள் தண்டனை விதிக்கப்பட்டதால் ராஜ்ஜிற்கு தனது எங்சிய வாழ்நாளை சிறையில் கழிக்கவேண்டிய அபாயம் நேர்ந்துள்ளது.இந்த 14 குற்றச் சாட்டுக்களில் 9 குற்றச்சாட்டுக்கள் சட்டவிரோத உள்வியாபாரத்திற்காகவும் எஞ்சிய 5 குற்றச்சாட்டுக்கள் திட்டமிட்ட சதி என்றமுறையிலும் நிரூபிக்கப்பட்டுள்ளன.எது எவ்வறாயினும் ராஜ்ஜின் சட்டத்தரணி இதனை எதிர்த்து மேன் முறையீடு செய்யப்போவதாக அறிவித்துள்ளார்.

அண்மையில் அமெரிக்காவில் எடுக்கப்பட்ட ஒரு கருத்துக் கணிப்பில் அமெரிக்கப் பொதுமக்களில் ஒரு சாரார் வியாபாரப் போட்டி காரணமாக பல பெரும் முதலைகள் இணைந்து ராஜ்ஜை சிக்கவைத்து விட்டது எனவும் மறுபுறம் சட்டம் அனைவருக்கும் சமம் என்பது அமெரிக்காவில் மீண்டும் நிரூபிக்கப்பட்டுவிட்டது என பெருமளவானவர்களும் கருத்துத் தெரிவித்துள்ளார்கள்.

அரசின் உத்தியோகபூரவ செய்திக் குறிப்பைப் பார்வையிட இங்கே சொடுக்கவும்.

ராஜ் மீதான வழக்கு விசாரனை, குற்றச்சாட்டுக்கள் பற்றி இணையத்தில் தேடியபோது அவர் சிக்கியது எவ்வாறு என பல சுவாரசியமான தகவல்கள் கிட்டின. அவற்றைப் பார்வையிட இங்கே சொடுக்கவும்.

பேசும் படம் - Hotel Rwanda

2011-05-16T09:36:00.001+05:30

வெசாக் விடுமுறையில் யாழ் வந்து என் நெருங்கிய நண்பனொருவனில் வீட்டில் இராப் பொழுதொன்றைக் கழிக்கையில் தற்செயலாக நாங்கள் பார்த்த திரைப்படம் Hotel Rwanda.. .2005ம் ஆண்டு காலப்பகுதியில் இந்தப் படம் வெளியாகியிருந்தாலும் இப்போது தான் எனக்குப் பார்க்கக் கிடைத்தது.உங்களில் பலர் ஏற்கனவே பார்த்துமிருக்கக்கூடும்.1990 களின் நடுப்பகுதியில் Rwanda வில் நடைபெற்ற ஏறக்குறைய ஒரு மில்லியன் மக்களைக் காவு கொண்ட ஓர் பெரும் இனவழிப்பின்போதான ஓர் உண்மைக் கதையைப் படமாக்கியிருக்கிறார்கள்.

Paul Rusesabagina எனும் ஹோட்டல் முகாமையாளர் ஒருவரது உண்மைக் கதை தான் இது..றுவண்டாவை Belgium கைப்பற்றி ஆட்சி செய்லையில் நிர்வாக வசதிகளிற்காக Tutsi இன மக்களினை முதன்மைப் படுத்திவிட்டு பின்னர் ருவண்டாவைவிட்டு வெளியேறுகையில் பெரும்பான்மை Hutu மக்களிடம் நாட்டை ஒப்படைத்துவிட்டுச் செல்கிறது . ருவண்டாவில் வாழ்ந்த Tutsi மற்றும் Hutu இன மக்களிடையே ஏற்படு(த்தப்படு)ம் கலவரம் எவ்வாறு இனவழிப்பாக மாற்றப்படுகின்றது..Paul Rusesabagina தனது குடும்பத்தையும் அவரது ஹொட்டலில் சரணடைந்துள்ள ஆயிரக்கணக்கான மக்களையும் காப்பாற்றுவதற்கான ஒரு சாதாரண மனிதனின் அபரிமிதமான போராட்டம் தான் படத்தின் கதை..

கதையினிடையே கலவரங்களைத் தூண்டும் பெருச்சாளிகளின் நிஜ முகங்கள், உசுப்பேத்தல்கள்.. ஐ.நா வின் மீட்பு நடவடிக்கையிலுள்ள ஓட்டைகள்.. மேல் நாட்டவர்களின்(western people) தங்கள் நலனின் மீதான அதீத அக்கறையும் ஆபிரிக்க மக்கள் மீதான இளக்காரம்..சில நல்ல மனிதர்களின் கையறு நிலமை,ஆற்றாமை, இனவழிப்பு, போர்க் குற்றம் ,ஐ.நா என ஏதேதோ எனப் பல பேசப்படா உண்மைகளைப் படம் பேசிச் செல்கின்றது..

முடிந்தால் Hotel Rwanda வை ஒருமுறை பாருங்கள்..படம் பே(சா/சமுடியா)ப் பொருளை பேசத்துணிந்திருக்கின்றது.

காலக் கண்ணாடி.. 90களில் யாழ்ப்பாணம்..

2011-04-09T07:26:00.002+05:30

அண்மையில் GroundViews இணையத் தளத்தை மேய்ந்து கொண்டிருக்கையில் காணக்கிடைத்த காணொளி..90களில் நான் சிறுவனாயிருந்தபோதும்..இப்போதும் நன்கு நினைவிருக்கின்றது..பொருளாதாரத் தடைகளின் மத்தியில் எமது மக்கள் அன்றாட வாழ்க்கைக்காகப் போட்ட நெருப்பாற்று நீச்சல்..

சவர்க்காரத்துக்குப் பதிலாக பனம்பழத்தைப் பாவித்து உடுப்புத் துவைத்தது..
ஜாம் போத்தலிலில் விளக்குச் செய்து மண்ணெண்ணெயை உச்சமாகப் பாவித்து குப்பி விளக்கில் படித்தது..
வானொலியில் செய்தி கேட்பதற்காக சைக்கிள் (அப்போதைய எங்கள் தேசிய வாகனம்) மிதித்து தைனமோ சுழற்றியது...

இப்படி அடுக்கிக் கொண்டே போகலாம்..

இவ்வாறாக இப்போதெல்லாம் பேச மறந்தே போய்விட்ட எமது வாழ்க்கையின் ஒர் காலத்தைப் பேச முயல்கிறது கண்ணன் அருணாசலத்தின் இந்தக் காணொளி..

Kerosene from Kannan Arunasalam on Vimeo.

நன்றி..
GroundView, mooving Images, Kannan Arunasalam

இணையத்தின் மீதான நம்பிக்கை இழக்கப்படுகிறதா..??

2011-01-06T10:49:00.000+05:30

அண்மையில் நண்பன் ஒருவனுடன் உரையாடிக்கொண்டிருந்தபோது உலகமே தனது சகல தேவைகளையும் இணையத்தினூடே வீட்டிலிருந்தவாறே நிறைவேற்றுமளவிற்கு வந்துவிட்டது.நம்மூரெல்லாம் எப்போது அந்த நிலைக்கு வரப்போகின்றது என அதிகமாகவே ஆதங்கப்பட்டான்.அவன் சொல்வதற்கு மாறாக என் கருத்தைத் தெரிவித்து வழமையாகவே விவாதத்தை ஆரம்பித்துவைப்பேன் (அது தான் என் கருத்தாய் இருந்தால் கூட..) இன்றும் அவ்வாறு தான்... இணையம் ஒன்றும் நில்லையானதும் உறுதியானதுமான நிலையை அடைந்துவிடவில்லை..அதுவும் நம் நாட்டில் இன்னும் அதிகமாகவே..ஆகவே அத்தியாவசிய தேவைகள் எல்லாவற்றையும் நாங்கள் முழுமையாக இணையத்திலேற்றிவிட்டால் அது சிக்கலில்தான் முடியும் என .ஆரம்பித்தேன் என் (கு)தர்க்கத்தை ..அண்மையில்த் தான் வலையில் 2010ல் இணையத் திலேற்பட்ட பிரதான சம்பவங்களையெல்லாம் தொகுத்திருந்த ஒரு கட்டுரையை வாசித்திருந்தேன்.எல்லாவற்றையும் இழுத்து அவனை உண்டு இல்லை என்றாக்கிவிட்டேன்.நீண்ட காலத்தின் பின் அவனை மடக்கிவிட்ட திருப்தி எனக்கு..கடந்தவருடத்தில் இணையத்திலியங்கும் நிறுவனங்கள் எதிர்கொண்ட சிக்கல்களை இப்போது பார்ப்போம்.

ஏதாவதொரு விடயம் பற்றி அறிவதாயிருந்தால் நாம் உடனே இணையத்தில் அணுகுவது Wikipeediaவைத் தான்.கடந்த பங்குனி மாதமளவில் Wikipeedia சில மணி நேரம் செயலிழந்திருந்தது.Googleஇன் தரவுகளின்படி நாளுக்கு 50 மில்லியனிற்கு மேற்பட்ட வாசகர் வரவு கொண்டது Wikipeedia . ஆகவே Wikipeedia யாரது கண்ணிலும் படாமல் தனது செயலிழப்பைச் (சில நிமிடங்களாயிருந்தால் கூட) சீர்செய்வது சாத்தியப்படாது . Wikimediaவின் UKயிலுள்ள தகவல்வழங்கி மிகைசூடாகி ;) (over heated) செயற்பாட்டை நிறுத்தியதைத் தொடர்ந்து வரிசையாக சில செயலிழப்புகள் ஏற்பட்டது தான் இப் பிரச்சினைக்குக் காரணமானது.சில மணிநேரத்தில் இப் பிரச்சினையை அவர்கள் சீர் செய்து விட்டார்கள்.மேலதிக விபரங்களிற்கு அவர்களது விளக்கம் இங்கே.

நம்மில் பலர் Wordpress இனை பதிவிடுவதற்கு உபயோகிக்கிறோம்.10மில்லியனிற்கு மேலான பதிவுகள் wordpress மூலமாக இடப்படுகின்றன.Techcrunch போன்ற பல பிரபல பதிவு நிறுவனங்கள் கூட Wordpressஐத் தான் உபயோகிக்கின்றன.கடந்த வருட ஆரம்பத்தில் Wordpress (மாசி மாதமளவில்) இரு மணி நேரத்திற்கு மேலாக சில வலையமைப்பு பிரச்சினைகளால் செயலிழந்திருந்தது.மேலதிக விபரங்களிற்கு அவர்களது விளக்கம் இங்கே.

Googleஇன் பிரபல மின்னஞ்சல் சேவையான Gmail கடந்த வருடம் மாசி,பங்குனி,புரட்டாதி மாதங்களில் சில சிக்கல்களை எதிர்கொண்டது.ஆயினும் Gmail நிறுவனத்தினர் இச் சிக்கல்களால் பெரும்பாலான சந்தர்ப்பங்களில் பெருமளவு பாவனையாளர்களும் பாதிக்கப்படாமல் தவிர்த்துக்கொண்டனர்.எனினும் குறித்ததொகையிலான வாடிக்கையாளர்கள் பாதிக்கப்பட்டிருந்தனராயினும் Google என வருகையில் இது பெருமளவு கவனத்தைப் பல மட்டங்களிலும் ஈர்ப்பது தவிர்க்கமுடியாதது.மேலதிக விபரங்களிற்கு அவர்களது விளக்கம் இங்கே.

சீனா கடந்த சித்திரை மாதத்தில் 18 நிமிடங்களிற்கு உலகளாவிய இணைய உபயோகத்தின் 15% சதவீத நெரிசலை வலிந்து China Telecom ஊடாக நகர்த்தியிருந்தது.வழமையாக இந்த அளவிலான நெரிசலை சமாளிக்க முடியாமல் செயலிகள் செயலிழந்துவிடும்.ஆனால் China Telecom இதனை திறமையாகக் கையாண்டிருந்தது.இது திட்டமிட்ட நடவடிக்கையா, தற்செயலானதா என்று அக்காலப்பகுதியில் சர்ச்சை எழுந்திருந்தது.ஆனால் எது எவ்வாறானாலும் சம்பவம் நடந்தது உண்மையானது.மேலதிக விரிவான விளக்கம் இங்கே.

500மில்லியன் பாவனையாளர்களைத் தன்னகத்தே கொண்டது Facebook.கடந்த நான்கு வருடங்களில் Facebook சந்தித்த மோசமான சம்பவத்தைக் கடந்த புரட்டாதி மாதத்தில் சந்தித்திருந்தது.ஓர் பின்னூட்ட loop தொடர்ச்சியாகச் செயற்பட்டு அவர்களது databaseஐ கடும் நெரிசலுக்குள்ளாக்கி செயலிழக்கச் செய்தது. இதனை சடி செய்ய facebookகை முழுமையாகவே 2.5 மணிநேரம் நிறுத்திவைக்க வேண்டையதாயிற்று mark zuckembergற்கு..மேலதிக விபரங்களிற்கு அவர்களது விளக்கம் இங்கே.(havard network அதிகாலை 4 மணிக்கு mark zuckemberkஆல் செயலிழக்கச் செய்யப்பட்ட கதையை Facebookஉருவான கதையில் குறிப்பிட்டிருந்தேன்..இந்த நேரம் zuckemberkற்கு அது தான் நினைவிற்கு வந்திருக்குமென்று யாரும் இங்கே ஆரூடம் கூற முற்பட வேண்டாம்.. ;) ).

மில்லியன் கணக்கான வாடிக்கையாளர்கள் தமது கொடுக்கல் வாங்கல்களிற்காக paypal உபயோகிக்கிறார்கள்.ஆயிரக்கணக்கான நிறுவனங்கள் தமது வர்த்தக நடவடிக்கைகளிற்கு paypalஇல் தங்கியுள்ளார்கள்.paypal சேவை சில மணி நேரம் செயலிழந்தால் ஏற்படக் கூடிய வியாபார நட்டத்தை எண்ணிப் பாருங்கள்.கடந்த ஐப்பசி மாதமளவில் 4.5 மணி நேரம் Paypal செயலிழந்திருந்தது.மேலதிக விபரங்களிற்கு இங்கே.

கடந்த காற்பந்து உலகக் கின்ண காலத்தில் Twitter பல தடவை செயலிழந்திருந்தது அல்லது மெதுவாகியிருந்தது.மேலதிக விபரங்களிற்கு இங்கே.wikileaks மீது இனைய உலகில் பிரயோகிக்கப்பட்ட நெருக்கடிகளும், Wikileaks ஆதரவாளர்களால் ஏனைய நிறுவனங்களிற்கு கொடுக்கப்பட்ட நெருக்கடிகளையும் ஏற்கனவே wikileaksற்கு ஓர் மாற்றுத் தெரிவு பகுதியில் குறிப்பிட்டதால் இங்கு சேர்த்துக்கொள்ளவில்லை.

இவை யாவும் உலகப் பிரசித்தி பெற்ற இணையத்திலியங்கும் நிறுவனங்கள் கடந்த வருடத்தில் மட்டும் எதிர்கொண்ட நெருக்கடிகள்.இவை இணையம் இன்னும் ஓர் நிரம்பலான நிலைதகு நிலையை அடையவில்லையோ என்ற சந்தேகம் பலரிற்கு எழச் செய்த சம்பவங்கள்.. எது எவ்வாறானாலும் இச் சிறு சிறு சம்பவங்களால் அந்த நிறுவனங்கள் ஒன்றும் செயலிழந்துவிடவில்லை.தம்மை சீர் செய்துகொண்டு சில மணி நேரங்களிலேயே வழமைக்குத் திரும்பிவிட்டன என்பது தான் இங்கே கவனிக்கப் பட வேண்டியது.

உங்கள் முன்னாலுள்ள பாரிய சவால்கள்..

2011-01-04T12:41:00.001+05:30

பெற்றோர்களே..!!
உங்கள் தண்டனைகளை நீங்கள் புதுப்பித்தேயாக வேண்டும்.மரபு வழித் தண்டனைகள் இனி வேலைக்காகாது..

நாளைய இளைஞர்களே..!!
நாளை உங்கள் பெற்றோர் உங்களுக்கு Facebookஇல் friend request அனுப்பினால் என்ன செய்வீர்கள்..!! ??சிந்தியுங்கள்..செயற்படுங்கள்..

ஏதோ எங்களால் முடிந்த உதவி ;)

எங்கள் சிபாரிசு..

புதிது புதிதாய் எதனையெல்லாமோ புகுத்தும் நீங்கள் ஏன் இப்படியொரு வசதியையும் அறிமுகப்படுத்தக்கூடாது..??

நாளை நாமும்..
இன்று இவர்..நாளை நாமும் கூட..

உங்கள் கணனி அடிக்கடி செயலிழக்கிறதா..??
கவலையை விடுங்கள்.. இனி மேல் நீங்களும் கணனி திருத்துவதில் விற்பன்னர் தான்..

பிற்குறிப்பு: குப்பிறப் படுத்திருந்து இவ்வாறெல்லாம் சிந்தித்தது நான் அல்ல..

நன்றி: abstrusegoose,coolmaterial, endlessorigami, strikegently, graphjam

Windows 7.. Google Chrome.. எது உங்கள் தெரிவு..??

2010-12-28T12:47:00.003+05:30

நீங்கள் உங்கள் கணனி உங்கள் வேகத்திற்கு ஈடு கொடுக்கின்றதில்லையே என அடிக்கடி கடுப்பாகின்றீர்களா..?? கற்பனை செய்து பாருங்கள்..

நீங்கள் உங்கள் மின்னஞ்சலை பார்வையிடுவதற்காக உங்கள் கணனியை இயக்கியவுடன் வழமைபோல் உங்கள் கணனி இயங்குநிலையை அடையும் வரை நீண்ட நேரம் காத்திருக்காமல் சில செக்கன்களிலேயே உங்கள் மின்னஞ்சல் முகவரிக்குச் சென்றுவிட்டால்..நீங்கள் கணனியை வாங்கும்போது இயங்கிய வேகத்திலேயே தொடர்ந்து இயங்கினால்.. நீங்கள் எங்கிருந்தாலும் திடீரென்று தேவைப்படுகையில் நீங்கள் சேகரித்த தகவல்களை உபயோகிக்கக் கூடியதாயிருந்தால்... உங்கள் கணனி தொலைந்துவிட்டால் உங்கள் தரவுகள் முழுமையாகவே இழக்கப்பட்டுவிடுமே என்னும் பயமில்லாது போய்விட்டால்...புதிதாய் நீங்கள் வாங்கும் வன்பொருட்களை(digitel camera,Printer,etc.) கணனியுடன் இணைப்பதற்கிடையில் நீண்ட நெடிய படிமுறைகளைத் தாண்ட வேண்டியில்லாமல் கணனியுடன் இனைத்தவுடன் வேகமாகவே உபயோகிக்கக்கூடியதாயிருந்தால்...நீங்கள் குதூகலமாயிருப்பீர்கள் என உணர்கிறீர்களா..??

கவலையை விடுங்கள்..Google உங்களுக்காகவே Chrome OS உடன் தயாராகிவிட்டது.. உங்களுக்குப் பரீச்சயமான Microsoft windows போன்ற ஆனால் புதியதொரு இயங்குதளம்(operating system)..இது பெரும்பான்மையாக இணையத்தை அடிப்படையாகக் கொண்டதொரு இயங்கு தளம்..

இவ் இயங்கு தளம் நேரடியாகவே உங்கள் Google Chrome உலாவியில்(Browser) இயக்கத்தை ஆரம்பிக்கும்.Chrome இயங்குதளம் உங்கள் கணனியின் சேமிக்கப்படப்போவதில்லை.உங்கள் hard diskகை உபயோகிக்கப்போவதில்லை. எல்லாம் இணைய வலைப்பின்னலூடாகத் தான்.. சகல வேலைகளையும் நீங்கள் chrome உலாவியிலிருந்தே(Browser) ஆற்ற வேண்டியது தான்..

Cromeஇன் ஒரு Tabல் உங்கள் word processing வேலையை,இன்னொரு tabஇல் பாடல் கேட்பது..இன்னொரு Tabஇல் மின்னஞ்சல் உபயோகிப்பதைக் கற்பனை செய்யுங்கள்..இது தான் இந்த இயங்குதளம் இயங்கப் போகும் பாணி..ஆஹா..உடனே I hate Chrome OS.. I dont want to listen music in a tab.. என்று facebookல் குழுமம் ஆரம்பிக்கப் புறப்பட்டுவிட்டீர்களா..??பொறுமை..பொறுமை.. உங்களைப் போன்றவர்களுக்காகத் தான் மாற்று ஏற்பாடாக panels வசதியை Google செய்துள்ளது.Gmail உபயோகிக்கும்போது chat வசதி கீழே Task barற்கு அண்மையில் minimize ஆகத்தக்கவாறு வருமே.அது போன்றதோர் ஏற்பாடு தான். நீங்கள் உங்கள் mouse pointer ஐ அண்மையில் கொண்டு செல்கையிலேயே உரிய panels எழுந்து இயங்கத் தகு நிலையை அடைந்துவிடும்.அதிக tab உலாவியில்(browser) இருப்பது உங்களுக்குப் பிடிக்காவிட்டால் அவற்றை அவற்றின் தன்மைக்கேற்ப ஒன்றாக்கும் யுக்தியையும் pinned tabs முறை மூலம் ஏற்படுத்தியுள்ளார்கள்.இது போன்ற பாவனையாளர்களின் விருப்பு வெறுப்பிற்கேற்ற மாற்றங்களை ஏற்படுத்துவதற்காக இம் மாதம் முதல் பரீட்சார்த்தமாக வெவ்வேறு பட்ட தரப் பாவனையாளர்களிற்கு Chromeஇயங்கு தளமுள்ள விசேட notebook வகைக் கணனிகளை அமெரிக்காவில் புழக்கத்திற்கு விட்டுள்ளது Google.

சகல தேவையான மாற்றங்களையும் செய்த பின்னர் இவ் இயங்கு தளத்தை அடுத்த வருட நடுப்பகுதியில் உத்தியோகபூர்வமாக அறிமுகப் படுத்த உத்தேசித்துள்ளதாம் Google.முதலில் மடிக்கணனிகளில் ஆரபித்து இரு புறமாகவும்(Desktops,Smart phones) விஸ்தரிக்க உள்தாகவும் தெரிவிக்கிறார்கள். Google ஏற்கனவே Smart phone வகையில் Android மூலம் குறிப்பிடத்தக்கதோர் வணிக இடத்தைப் பிடித்துள்ளது குறிப்பிடத்தக்கது.Chrome OS ற்கான வர்த்தக உடன்பாடு ஏற்கனவே பிரபல மடிக்கணனி நிறுவனங்களான HP,Acer,ASUS,Lenovo,Toshiba போன்றவற்றுடன் எட்டப்பட்டுவிட்டது. இவ் இயங்கு தளம் கட்டற்ற மென்போருளாகவுள்ளதால் ஒப்பீட்டளவில் குறைந்த விலையில் அடுத்த வருடத்தில் மடிக்கணனிகளை எதிர்பார்க்கலாம்.

எது எவ்வாறெனிலும் Microsoft windows இன் licenceஐ நாங்கள் நன்றி..நன்றி என்று கூறிக்கொண்டேயிருக்க நமது உள்ளாடைகளை உருவும் ஓர் உடன்படிக்கை என விமர்சிப்பவர்கள் பலர் உள்ளனர். உலகில் வேறும் பல இயங்கு தளங்கள் (OS) இதுவரை அறிமுகப் படுத்தப்பட்டு போட்டியிட்டாலும் தகுந்த நெருக்கடியை அது Microsoft ற்கு வழங்கவில்லை என்பது ஏதோ உண்மை தான்.அத்துடன் Microsoft vistaவுடன் நெருக்கடிப்பட்டுக்கொண்டிருந்த 2007 காலப்பகுதியில் இவ் இயங்குதளத்தை Google அறிமுகப் படுத்தியிருந்தால் சாதித்திருக்கலாம்.ஆனால் இப்போது Windows 7 ஓரளவு வெற்றிபெற்றுவிட்ட நிலையில் Microsoftஇடம் Googleஇன் இந்தப் பருப்பெல்லாம் வேகாது என்போரும் உள்ளார்கள்.ஆனால் Google ஒன்றும் மண்குதிரை அல்ல.பந்தயக் குதிரை.. ;)

இந்த இயங்கு தளத்தை Google உருவாக்குவதால் அதன் வர்த்தக நாமமும், பிரபலமும், வணிக உத்தியும் சிறந்ததொரு போட்டியை Microsoft ற்கு கொடுக்கும் என நிச்சயமாக எதிர்பார்க்கலாம்.

இது கொஞ்சம் ஓவர் தான் ;)

எது நடந்தாலும் “speed, simplicity and security,” எனும் Goole Chrome OS இன் தாரக மந்திரத்திற்கு எங்களூர் இணைய வேகம் ஈடுகொடுக்குமா என்பது தான் நம் முன்னாலுள்ள பெரிய சவால்...

பிற்குறிப்பு: பதிவர் ஜனா அண்னா தனது மாத்தி யோசி பதிவில் என்னை

தொழிநுட்பம் சம்பந்தமான ஒரு நவீன பதிவு எழுதுமாறு அழைப்பு விடுத்திருந்தார்.இயல்பாகவே எனக்கு Google மீதுள்ள ஆர்வத்தால் இவ் இயங்குதளம் பற்றி எழுதுவோமா வேண்டாமா என சிந்தித்துக் கொண்டிருக்கையில் அவரது இந்த அழைப்பு சாதகமாய்ப் போய்விட்டது..

( தொழிநுட்ப ஆணியே பிடுங்கவேண்டாமென்ற நண்பர்களிடமிருந்து தப்பிக் கொள்ள.. ;) )

போலி கலாச்சாரக் காவலர்களும் இணையமும்...

2010-12-25T09:01:00.005+05:30

பூத்திருக்கும் புத்தாயிரமாம் ஆண்டு..மிலேனியம் என்றெல்லாம் விவாதத் தலைப்புகள் வழங்கப்பட்டது நேற்றுப்போல் இருக்க ..இதோ விடைபெறுகிறது 2010.. தொழிநுட்ப உலகில் பிரதானமாக இணைய உலகு கடந்த தசாப்த காலத்தில் கண்ட மாற்றம் அளப்பரியது.2000ஆம் ஆண்டின் ஆரம்ப காலத்தில் 361 மில்லியன் இணையப் பாவனையாளர்கள் உலகில் இருந்திருக்கிறார்கள்.இந்தத் தொகை ஏறக்குறைய இன்றைய facebook பாவனையாளர்களின் தொகையின் அரைப்பங்கே..ஆனால் இவ் வருட இறுதியில் உலகளாவிய இணையப் பாவனையாளர் தொகை இரண்டு பில்லியனைக் கடந்துவிடும் என எதிர்பார்க்கப்படுகின்றது.

குறிப்பிடத்தக்கவகையில் இந்த தசாப்த காலத்தில் ஆபிரிக்கக் கண்டத்தின் வளர்ச்சி வேகம்(>2000%) பிரமாண்டமானது.அதிலும் குறிப்பாக 2000ஆண்டு காலப்பகுதியில் உலகின் பெருந்தொகையான இணையப் பாவனையாளர்கள் கொண்ட முன்னணி 10 நாடுகளில் இடம்பெற்றிருக்காது 61ஆவது இடத்திலிருந்த ஆபிரிக்க நாடான நைஜீரியா 2010ல் 10ஆவது இடத்தைப் பிடித்துள்ளது தான் இணைய உலகில் ஆபிரிக்காவின் பிரமாண்ட வளர்ச்சிக்கு சான்று பகர்கிறது.

இணையத் தொழினுட்பத் துறையில் Google,Facebook,Twitter போன்ற ஏராளமான தளங்கள் புகுந்து ஒரு கலக்குக் கலக்கிக் கொண்டிருப்பதுவும் இந்தத் தசாப்த காலத்தில்தான்..அதிலும் பிரதானமாக இவ் ஒரு தசாப்த காலத்தினுள் இணைய தொழினுட்பத்தின் சகல இடுக்குகளிலும் நுளைந்த google தன்னை ஓர் அசைக்கமுடியாத வல்லரசனாக நிறுவிக்கொண்டது.facebook 500 மில்லியன் பாவனையாளார்களைக் கடந்து 600 மில்லியனை நோக்கி வீறு நடை போட்டுக் கொண்டிருக்கிறது.facebook நிறுவுனர் Mark Zuckerberg தன்னை உலகின் மிக இள வயது செல்வந்தராக நிறுவிக்கொண்டார். இதேபோல் வணிக உலகில் இணையம் புகுந்து பெரும் மாற்றங்களைச் செய்துவிட்டது.Paypal,Amazon என நாங்கள் இணையமூடான வியாபார நடவடிக்கைகளிற்கு உதாரணமாகத் தெரிவித்துக்கொள்ளலாம்.

அண்மைக்காலத்தில் விக்கிலீக்ஸ் பல நாடுகளின் கண்களிற்குள் விரலைவிட்டு ஆட்டி,உலக வல்லரசுகளையெல்லாம் அதிர்ச்சிக்குள்ளாக்கிய பரபரப்பு இன்னும் அடங்கவில்லை.ஆக மொத்தம் இன்று உலகின் அன்றாட இயக்கத்திலிருந்து இணையமென்பது பிரிக்கமுடியாததோர் சக்தியாக தன்னை நிறுவிக்கொண்டு விட்டது.

ஆனால்..

இங்கே நம்மவர்களின் ஒரு பகுதியினர் இப்போதும் கூட, அதிகரித்துவரும் இணையப் பாவனை நம் இளைய சமுதாயத்தைச் சீர்ப்படுத்துகிறதா..சீரழிக்கிறதா என பாடசாலைகளில் விவாதம் நடாத்திக்கொண்டிருக்கிறார்கள்.இன்னொரு பகுதியினர் அதிகரித்துவரும் இணையப் பாவனை தான் நமது இளைய சமுதாயத்தை தவறான வழியில் திருப்பி கலாசார சீரழிவிற்குக் காரனமாகிறது என கிடைக்கும் இடுக்குகளில் எல்லாம் புகுந்து பிரச்சாரம் செய்து கொண்டிருக்கிறார்கள்..

பேச வேண்டியவர்கள் பேசாமல் இருப்பதும், பேசக்கூடாதவர்கள் பேசிக் கொண்டிருப்பதுமே எமது சமூகத்தின் பெரிய சாபக்கேடு..

-யாரோ

இலங்கைப் பதிவர் சந்திப்பு என்னில் ஏற்படுத்திய பாதிப்பு..

2010-12-23T09:27:00.006+05:30

அண்மையில் இடம்பெற்ற பதிவர் சந்திப்பிற்குச் சென்று வந்ததிலிருந்து பதிவிடுவோமென்று சிந்தித்தாலே பலவாறு சிந்திக்க வேண்டியிருக்கிறது.எங்கள் அண்ணன்மார் தெரிவித்த கலந்துரையாடிய கருத்துக்களை அனுசரித்துத் தான் இனிமேல் பதிவெழுதுவதாக அன்று முடிவெடுத்திருந்தேன்.

இப்போது தான் பார்த்தேன் பவன் தான் இரசித்த மொக்கைப் பதிவுகள் - 2010 என்று ஒரு பதிவிட்டிருந்தார்.அதிலே தேடிப்பார்த்தேன் என் பதிவு எதனையும் காணவில்லை.நான் எழுதும் எல்லாப் பதிவையும் மொக்கைப் பதிவாய்க் கருத்தித்தானே பதிவேற்றுகின்றேன்.ஒன்றுகூடவா பவனுக்குச் சிக்கவில்லை.கடுப்பாகி பவனுக்கு வெள்ளை வான் அனுப்புவோமாவென்று சிந்திக்கையில்தான் பவனுக்கு இன்னுமொரு சந்தர்ப்பம் வழங்கி அவரது 2011 பதிவுகளிலாவது இடம்பெறுவோமென்று முடிவெடுத்தேன். சின்மஜா.. உன் மொக்கை இராச்சியம் தான் இனியென்று ஒரு மொக்கைப் பதிவு எழுதுவோமென்று பார்த்தால்
பதிவர் சந்திப்பில் மன்னார் அமுதன்,கோபி தெரிவித்த கருத்துக்கள் நினைவிற்கு வந்து தொலைத்தது.

அப்போ எப்படி நான் இரசித்த மொக்கைப் பதிவுகள் - 2011ல் இடம் பிடிப்பதென்று கடும் சிந்தனையில் மூழ்குகையில் தான் பதிவர் சந்திப்பில் லோசன் அண்ணா, அசோக்பரன் எது பற்றியும் எழுதலாம் என தெரிவித்த கருத்துக்கள் நினைவிற்கு வந்தது.அப்பாடா..எனக்கும் ஆதரவு தெரிவிக்க இவர்கள் இருக்கிறார்கள் தானே என்ற ஊக்கம் மொக்கைப்பதிவு எழுதியே தீருவதென்ற எனது கொலை வெறியை உச்சமாக்கியது.

சரி தட்டச்சுவோம் என்றால் மயூரன் அண்ணா பதிவர் சந்திப்பில் தெரிவித்த தட்டச்சு அரசியல் நினைவிற்கு வந்தது.சேது ஐயா தெரிவித்த பழைய பாமினியா..புதிய பாமினியா இல்லை tamil 99 ஆ எதை உபயோகிப்பதென்று சந்தேகம்.சரி நானும் தமிழ் வளர்ப்போமென்றால் அந்த தட்டச்சு முறை எதுவுமே எனக்குத் தெரியாது.சரி பழகித் தட்டச்சுவோமென்றால் ..நாங்கள் தமிழ் மொழி மூல ஆரம்பக்கல்வி தானே கற்றிருக்கிறோம் .எங்களுக்கு இந்தப் பிரச்சினை அவசியமில்லையென்று யாரோ பதிவர் சந்திப்பில் தெரிவித்தது நினைவிற்கு வந்தது.யாரென்று தான் நினைவிற்கு வரவில்லை.சரி வழமை போல எமக்கென்றே உருவாக்கப்பட்ட Ammaa ..அம்மா முறை tamil phonetic லேயே மீண்டும் தஞ்சம் அடைவதாய்த் தீர்மானித்தேன்.

சரி ஆரம்பிப்போம் நமது மொக்கைப் பதிவை என்று பார்த்தால் ..பதிவர் சந்திப்பில் சுபாங்கன் நினைவிற்கு வந்தான்.மின்னஞ்சலை மூலமாய் வைத்து மொக்கைப் பதிவிடுவோமென்றால் இறுதியில் நன்றி மின்னஞ்சல் என்று போட முடியாது.சரி யார் அனுப்பினானோ அவன் பெயரைப் போடுவோமென்றால் அவனே யாருடையதோ மின்னஞ்சலை forward சிய்திருந்தான்.முதலில் அனுப்பியவனை ஆராய்ந்து கண்டு பிடிப்பது சிரமமாயிருக்கிறது.

மொக்கையே எனக்கு சரி வராது போல.. சரி விடு.. யாராவது கேட்டால் நாமள் சமுதாயப் பொறுப்புணர்வான பதிவர் என்று ”றீல்” விடுவம் என்று முடிவெடுத்திட்டேன்.

இதற் கிடையில் பதிவர் சந்திப்பில் அறிமுகமான ஜனா அண்னா மாத்தி யோசி என என்னை நவீன தொழினுட்பத் பதிவெழுதுவதற்கு அழைத்திருந்தார்.ஏற்கனவே தொழினுட்பப் பதிவென்று நான் அதிகமாக கழுத்தறுப்பதாக நண்பர்கள் குறைப்பட்டுக் கொண்டதால் இனிமேல் தொழிநுட்ப ஆணியே புடுங்குவதில்லை என்ற எனது முடிவை தளர்த்தி ஜனா அண்னாவின் அன்புக் கோரிக்கையை செவிமடுப்போம் என்று முடிவெடுத்தேன்.புதிய தொழிநுட்பப் பதிவொன்று எழுதுவதென்று மாற்றி மாற்றி யோசிச்சுப் பார்த்தேன்...ம்ஹீம்.. "தொழிநுட்பம் சம்பந்தமான ஒரு நவீன பதிவு”..தலைப்பிலேயே சந்தேகம். அதென்ன நவீன..?? ஏதாவது பின் ,முன் நவீனங்களைக் கலந்து கட்டி தொழிநுட்பப் பதிவு எழுதச் சொல்கிறாரோ..?? எனக்குத் தான் பின்,முன் நவீனத்துவம் என்றாலே என்னவென்றே தெரியாதே..!! என்ன செய்ய..?? இதையொருமுறை பார்த்துச் சொல்லுங்கள் ஜனா அண்னா..!!மாத்தி மாத்தி யோசிக்க இது தான் நினைவிற்கு வருகிறது.இது போன்ற பதிவு உங்கள் கோரிக்கைக்கு அமைகிறதா..??

அடப்பாவிங்களா..!! இவ்வளவு முயன்றும் எதைப் பற்றிப் பதிவிடுவதென்று எனக்கு எதுவும் தோன்றுகிறதில்லையே..?? Any suggestions..??

பிற்குறிப்பு: இதுவொரு மொக்கைப் பதிவு ..அட நம்புங்கப்பா...

பெருகும் யாழ்ப்பாணத்தின் பெயரினாலான இணையத் தளங்கள்..

2010-12-21T12:12:00.003+05:30

தற்போது யாழ் குடாநாட்டில் இணையப் பாவனை, வீடியோ வசதிகளுடனான தொலைபேசிப் பாவனை என்பன இளைஞர்களிடையே மிக வேகமாக அதிகரித்தவாறுள்ளது.இதற்கேற்றவாறுயாழ்ப்பாணத்தின் பெயரிலோ இல்லை வேறு பெயர்களிலோ யாழ் செய்திகளை வெளியிடும் இணையத் தளங்களும் புற்றீசல்கள் போல அங்கொன்றும் இங்கொன்றுமாக பெருக்கெடுக்க ஆரம்பித்துவிட்டன.

இவை தமது செய்திகளை பல்வேறுபட்ட வாசகர் வட்டத்தைச் சென்றடைய facebook,twitter போன்ற சமூக இணைப்புத் தளங்களையும் உச்ச அளவில் உபயோகப்படுத்த ஆரம்பித்துவிட்டன.இந்த விளம்பர உத்தி சர்வதேச அளவில் ஏற்கனவே பிரபலமானதொன்று தான்.இதுபோன்ற பல உத்திகளை உபயோகித்து சில இணையத் தளங்கள் தமக்கென கணிசமானதொரு வாசகர் வட்டத்தை ஏற்கனவே திரட்டியும் விட்டன.அத்துடன் இவ்வாறான இணையத் தளங்கள் உலகெங்கும் பரந்து வாழும் யாழ் மீது அக்கறையுள்ள இளைஞர்களின் கவனத்தை மீண்டும் யாழ் நோக்கித் திசை திருப்புவதில் குறிப்பிட்டதொரு பங்கை ஆற்றி வருகின்றன.

இதுபோன்ற இணையத் தளங்கள் பெரும்பாலும் யாழிலுள்ள, யாழ்ப்பாணத்திற்கு வெளியேயுள்ள இளைஞர்களைக் கொண்ட சிறு சிறு குழுக்களாலேயே நிர்வகிக்கப்படுகின்றன.யாழின் தற்போதைய யதார்த்த கள நிலையை வெளிக்கொணரும் பல செய்திகளை இவ்வாறான இணையத் தளங்கள் அண்மைக்காலமாக முண்டியடித்து வெளியிட்டு வருகின்றன.இங்கே தான் பிரச்சினை ஆரம்பிக்கின்றது.
அந்தச் செய்தி வெளியிடப்படும் பாணி,அவற்றின் சொல்லாடல் பாங்கு போன்றவற்றில் பல(பெரும்பாலும் மூத்த) யாழ் அபிமானிகள் விமர்சிக்க ஆரம்பித்துள்ளார்கள்.இதே விடயங்களைக் காரணம் காட்டி சில இளைஞர்களும் ஆங்காங்கே தமக்குள் ஆதரவாகவும் எதிராகவும் வாதிப்பதும் இப்போது சகஜமாகிவிட்டது.

இவ்வாறான இணையத்தளங்களை விமர்சிப்ப்பவர்களின் வாதம் இதுவரை பல்வேறு அச்சுறுத்தல்களிற்கிடையே மிகுந்த நிதானத்துடனும் , சமூகப்பொறுப்புடனும் செய்திகளை வெளியிட்டு தம் உயிர்களைக் கூடத் தியாகம் செய்த ஊடகப் பாரம்பரியம் மிக்க யாழ்ப்பாணத்தில், இப்போது சில கெமெரா போணும்,சில ஆயிரம் பணமும் இருந்தால் யாரும் இணையத் தளங்களை உருவாக்கி நடாத்தலாம் எனும் நிலையைப் பயன்படுத்தி சும்மா சிறு இளைஞர் குழுக்கள் தளங்களை ஆரம்பித்து தமது தளங்களைப் பிரபலப்படுத்தவும்,வாசகர்களை அதிகரித்து விளம்பரங்களைப் பெறவும் சிறு சிறு சம்பவங்களையும் ஊதிப் பெருப்பித்து ஏதோ யாழ்ப்பாணம் சமூதாயச் சீர்கேடுகளால் அழிவின் விளிம்பிலிருப்பது போல செய்திகளாக்கி சிறிதும் சமூகப் பொறுப்பின்றி இணையத்தில் வெளியிடுகிறார்கள் என்றவாறாக அமைகின்றது.இவற்றின் உச்சக்கட்டமாக உணர்வுபூர்வமான விடயங்களைப் பற்றிய செய்திகளைக்கூடக் கிளுகிளுப்பான சொல்லாடல் முறையில் சிறிதும் சமூகப் பொறுப்பற்ற முறையில் எழுதுகிறார்கள் என்றவாறாகக் குறைப்பட்டுக் கொள்கிறார்கள்.சிலர் இந்த விமர்சனங்களிற்கப்பால் சென்று சில விடயங்களை சில மட்டங்களில் வெளியிடாமல் இருப்பது அல்லது மெலிதாக்கிய அளவில் வெளியிடுவதும் கூட சமூகப் பொறுப்புணர்வு தான் என்கிறார்கள்.

அவ்வாறான இணயத் தளங்களுக்கு ஆதரவானவர்களின் வாதம் இவ் இணையத்தளங்களை நிர்வகிப்பவர்களது முழு நேரத் தொழில் இதுவாயிருப்பதில்லை எனவும் சமுதாயப் பொறுப்புணர்வுக்காகத் தான் இவ்வாறான இணையத் தளங்களை நடாத்துகிறார்கள் என்றவாறாறு அமைகின்றது.அவர்கள் ஆதாரங்களுடன் தான் செய்தி வெளியிடுவதாகவும் சில அடிப்படை நாகரிகங்களிற்காகத் தான் அவற்றை வெளியிடாதுள்ளதாகத் தெரிவிப்பதாகவும் விளம்பரம் என்பது இவ்வாறான இணையத் தளங்களின் தொடர்ச்சியான நிலைத்திருக்கைக்கு அவசியமானதொன்றெனவும் அவ் இணையத் தளங்களிற்கு ஆதரவானவர்கள் வாதிடுகிறார்கள்.குறித்த இணையத் தளங்களில் எழுதுபவர்கள் பெரும்பாலும் இளைஞர்களே எனவும், அவர்கள் முறையான பயிற்சி பெற்ற ஊடகவியலாளர்கள் இல்லையெனவும் எனவே எழுத்து நடையில் சிறிது வித்தியாசம் இருப்பது தவர்க்கமுடியாதது என்கிறார்கள்.ஊடகப் பாரம்பரியம் பேசுபவர்களெல்லாம் பத்திரிகை மன நிலையிலிருந்து இன்னும் வெளிவராதவர்கள் எனவும்,அவர்கள் இணையத் தளங்களையும் பத்திரிகைகள் போலவே பார்ப்பதாகவும் வாதிடுகிறார்கள்.வேண்டுமானால் இவ்வாறு விமர்சிப்பவர்களே ஆக்கங்களை எழுதி அவ்வாறான தளங்களிற்கு மின்னஞ்சலாமே என்று வாதிடுகிறார்கள்.

எது எவ்வாறானாலும் சமுதாயப் பொறுப்புணர்வு எனும் சொல்தான் இங்கே இரு சாராரிடம் சிக்கி சின்னாபின்னப்படுகிறது.விக்கிலீக்ஸ் போன்ற இணையத் தளங்களெல்லாம் உலகையே தன் பக்கம் திருப்பியுள்ள நிலையில் நாமும் உலகின் வேகத்தில் இயங்கியேயாக வேண்டும்.உலகின் மாற்றத்திற்கேற்ப மாறியே ஆக வேண்டும்...கட்டற்ற இணையம் என்பது ஓர் பலமான ஊடகம்..

ஆயிரம் பூக்கள் மலர்வதில் தவறேதுமில்லை..

ஆனால் பூமாலைகள் மட்டும் குரங்குகளின் கையிலே சிக்கிவிடக் கூடாது...

பதிவர் கிறிக்கெற்.. பிந்திக் கிடைத்த திடுக்கிடும் செய்திகள்

2010-12-17T22:01:00.015+05:30

உலகே ஆவலுடன் நீண்ட காலமாக எதிர் பார்த்துக் காத்திருந்த இலங்கைப் பதிவர்களின் மாபெரும் கிறிக்கெற் திருவிழா நாளை இடம்பெறவுள்ள நிலையில் வெள்ளவத்தைப் பகுதியில் சிறு மழைப்பொழிவு ரசிகர்களிடையே சிறு சலனத்தை ஏற்படுத்தியுள்ளது.மழையை நிறுத்தவேண்டி ஆங்காங்கே ரசிகர்கள் மொனப் பிரார்த்தனைகளில் ஈடுபட்டுள்ளதைக் காணக்கூடியதாயுள்ளது.

போட்டி நடைபெறும் மைதானத்திற்கு மழையால் எந்தப் பாதிப்பும் இடம்பெற்றுவிடக்கூடாது என்பதில் கண்ணுங்கருத்துமாக உள்ள ஏற்பாட்டாளர்கள் அதற்கான முன் ஆயத்தங்களை ஏற்கனவே செய்துள்ளதாக அனுதினன் தெரிவித்துள்ளார். மைதானத்தை மூடித் தாழ்ப்பாள் இடுவதற்காக கடும் பிரயர்த்தனத்திலீடுபட்டுள்ளனர் பதிவர்கள் மது மற்றும் ஆதிரை.

இம்மழைத்துளிகள் பட்ட ஆடுகளம் எகிறி எழும் பந்துகளுக்கு சாதகமில்லையெனவும்,சுழல் பந்து வீச்சாளர்களுக்கே சாதாகமாய் நாளை அமையலாம் என பிரபல அனலிஸ்ற் கன்கொன் எங்கள் துடுப்பு இன்போ விற்கு வழங்கிய விசேட செவ்வியில் தெரிவித்துள்ளது குறிப்பிடத் தக்கது.

இவை தவிர நாளைய போட்டியில் அணிகளில் விளையாடவுள்ள வீரர்களை ஊகித்து அறிவிப்பதில் எங்கள் இலங்கை அணியின் தெரிவாளர் லோசன் அவர்கள் மும்முரமாக ஈடுபட்டுள்ளார்.அவ்வாறான ஏதாவது விபரங்கள் விக்கிரமாதித்தனால் இன்று பின்னிரவு நேரத்திலேனும் வெளியிடப்படலாமெனும் ஊகத்தின் அடிப்படையில் பலரும் பதிவுலீக்சை அவதானித்தவாறும் உள்ளனர்.

நாளைய போட்டியின் முடிவுகளை முன்கூட்டியே நிர்ணயிக்க ஆட்ட நிர்ணய சதிகள் ஏதாவது இடம்பெறுகிறதா என்பதை துப்புத் துலக்க இப்போதே சுபாங்கன் தலைமையிலான குழு மும்முரமாய் ஈடுபட்டுள்ளது.இதுவரை தமக்கு அவ்வாறான சம்பவங்கள் பற்றிய எந்த முறைப்பாடுகளும் கிடைக்கவில்லையெனவும்,அவ்வாறான முறைப்பாடுகள் கிடைத்தால் விசாரணைகள் மேற்கொள்ளப்படும் எனவும் லண்டனிலுள்ள கட்டுப்பாட்டு மையத்திலுள்ள பச்சிளம் பாலகன் வத்தி வெளியிட்டுள்ள ஊடக அறிவிப்புகள் தெரிவிக்கின்றன.

இத்துடன் அஷ்வின் ,பவன் உட்படப் பலவீரர்கள் மழையால் தமது துடுப்பாட்ட பயிற்சி பாதிக்கப்பட்டதைப் பொறுக்கமுடியாது சற்றும் தளராமல் காலுறையில் பந்தைக் கட்டித் துடுப்பாட்டப் பயிற்சியிலீடுபட்டதால் தொடர்மாடிகளில் வசிக்கும் பலரும் அசௌகரியங்களுக்குள்ளானதாக விசனம் தெரிவித்தனர்.இதற்கிடையில் சற்றும் தளராமல் கார்த்தி தனக்கு துடுப்பாட வாய்ப்பு இம்முறை வழங்கப்பட்டேயாக வேண்டுமெனவும், தன்னால் மைதானப்பையனாகத் தொடர்ந்து பணியாற்ற முடியாதெனவும் facebookல் கருத்துத் தெரிவித்தமை அவரது அணியில் உள்வீட்டுக் குத்துவெட்டுக்களின் ஒரு பகுதியே எனவும் ஊடகங்கள் தெரிவிக்கின்றன.

இதற்கிடையில் சுடுசோறு சுதா தான் நாளை போட்டியில் பங்கேற்க முடியாதென அறிவித்ததால், அவரிடம் ஆட்டோகிறாப் பெற போட்டிக்கு சுடு சோற்றுத் தட்டுடன் வர இருந்த ரசிகர்கள் பலரும் ஏமாற்றமடைந்துபோயுள்ளனர்.

நாளைய வரலாற்று முக்கியத்துவம் மிக்க போட்டியில் உங்கள் அனைவரையும் சந்திக்கும்வரை அன்புடன் விடைபெற்றுக்கொள்வது சின்மஜன்..

பிற்குறிப்பு: யாவும் கலப்படமற்ற கற்பனை.யாரையும் புண்படுத்தும் நோக்கம் எனக்கில்லை.பெயர்குறிப்பிட்ட பதிவர்களில் பலரிடம் எனக்கு நேரடி அறிமுகமில்லாதபோதும் யாரும் கோபிக்கமாட்டார்கள் என்று நம்பிக்கையின் அடிப்படையிலேயே அவர்களது பெயர்களை இங்கு இனைத்துள்ளேன்.

விக்கிலீக்கிற்கு மாற்றுத் தெரிவு..இதுவும் லீக் தான்..

2010-12-14T01:02:00.005+05:30

இதுவும் லீக் தான்.. ;)

அண்மைக்காலமாக விக்கிலீக்ஸ் உருவாக்கிவிட்டிருக்கும் பரபரப்பு இன்னும் தணியவில்லை.விக்கிலீக்ஸிற்கும் அதன் நிறுவுனர் Julian Assange ற்கும் ஆதரவாகவும் எதிராகவும் உலகெங்கும் குரல்கள் எழுப்பப்பட்டு வருகின்றன.

வரையறையற்ற இணையம்,கருத்துச் சுதந்திரம், வெளிப்படைத் தன்மை போன்றவற்றின் அடிப்படையில் Wikileaks ற்கும் அதன் நிறுவுனரிற்கும் ஆதரவான குரல்களும் , இதனைத் தொடர்ந்து அனுமத்தித்தால் நாடுகளின் இரகசிய உள்வீட்டுத் தகவல்கள் எல்லாம் வெளிப்படைத் தன்மையின் பெயரால் சென்றடையக் கூடாதவர்களிற்கெல்லாம் சென்றடைந்து தீவிரவாதிகளை ஊக்குவிக்கும்,இறுதியில் நாடுகளிடையில் குழப்பங்களை உருவாக்கி இன்னுமோர் உலக யுத்தத்திற்கு வழிவகுத்துவிடும் Wikileaks ற்கும் நிறுவுனர் Assange ற்கு எதிரான குரல்களும் பரவலாக எழுந்தவாறுள்ளன.

எது எவ்வாறாயினும் பாலியல் பலாத்காரக் குற்றச்சாட்டைக் காரணம் காட்டியே Julian Assange கைது செய்யப்பட்டிருக்கிறார்.அவர் மீது எவ்வாறான வழக்குகள் எல்லாம் இனித் தொடுக்கப்படும்.அதனை Julian Assange எவ்வாறு எதிர்கொள்ளப்போகின்றார் என்பதைப் பொறுத்திருந்து தான் பார்க்க வேண்டும்.ஆனால் அவரைப் பிணையில் எடுக்கும் நடவடிக்கைக்கு உதவ உலகின் பலபாகங்களில் இருந்தும் சில பெருந்தலைகள் முன்வந்துள்ள போதும் அதுவும் எந்த அளவிற்குச் சாத்தியமானது என்பதும் சந்தேகத்திற்குரியதே .

wikileaksன் சேவையை நிறுத்துவதற்கு நிகழ்த்தப்பட்ட DNS வழித் தாக்குதல்களை பல்வேறு இணைய முகவரிகளினூடே தங்கள் சேவையை வழங்குவதன்மூலம் wikileaks முறியடித்தது என்றே கூறிவிடமுடியும்.ஆனால் wikileaks நன்கொடை பெற ஊடகங்களாக உபயோகித்த paypal,Amazon போன்றவை பல்வேறு அழுத்தங்கள் காரணமாக தமது சேவை வழங்கும் நிபந்தனைகளைக் காரணம் காட்டி ,அவற்றை wikileaks மீறிவிட்டதாகக் கூறி திடீரென்று தமது சேவையை நிறுத்தியதால் wikileaks சிறிது ஆட்டங்காணக்கூடிய வாய்ப்புகள் தென்பட்டன. ஆனால் இவற்றால் கடுப்படைந்த wikileaks ஆதரவாளர்கள் (denial of service )இணைய நெரிசலை (traffic) அதிகரிப்பதனூடாக Amazon,Paypal போன்ற தளங்களை யாவரிற்கும் சேவை வழங்க முடியாத நிலைக்கு இட்டுச்சென்று முடக்கும் முஷ்தீபுகளில் ஈடுபட்டதாகவும் ,இதனை தாங்கள் வெற்றிகரமாக முறியடித்து விட்டதாகவும் Amazon,Paypal போன்ற தளங்கள் அறிவித்து விட்டன.

ஆச்சரியப் படத் தக்க வகையில் facebook wikileaksற்கு எதிராக எந்த நடவடிக்கைகளையும் தாங்கள் தற்போதைக்கு எடுக்கப்போவதில்லை என அறிவித்து கட்டற்ற இணைய ஆதரவாளர்களிடம் சரிந்திருந்த தனது செல்வாக்கை உயர்த்திக்கொண்டது. twitter பிரபல tweets பகுதியில் wikileaks சம்பந்தமான செய்திகளைத் திட்டமிட்டவகையில் தவிர்க்கின்றதோ எனச் சில கட்டற்ற இணைய ஆதரவாளர்களின் விமர்சனத்திற்குள்ளாகியது.ஆனாலும் twitter அதனை மறுத்திருந்ததோடு அதற்கான விளக்கத்தையும் தெளிவுபடுத்தியிருந்தது.

எது எவ்வாறானாலும் wikileaksன் அசுர வளர்ச்சிக்கும் அதன் இன்றைய சரிவிற்கும் பலர் அது கொண்டிருந்த சில உள் வீட்டுக் குறைபாடுகள் தான் காரணமாகிவிட்டதாக விமர்சிக்கிறார்கள். இதில் பிரதான காரணமாகக் wikileaks ஆனது அதன் நிறுவுனர் Julian Assange என்ற தனிமனிதரில் முழுமையாகத் தங்கியிருந்ததனைக் குறிப்பிடுகின்றார்கள். அத்துடன் இரகசியமாகப் பெறும் தகவல்களை அவர்களே வெளியிடுவதால் அதன் நம்பகத்தன்மை நடுநிலையாகத் தீவிரமாக ஆராயப் படுவத்தில்லை எனும் கருத்தும் முன்வைக்கப்படுகின்றது.இது எந்த அளவிற்கு உண்மையானது எண்பதில் வாதப் பிரதிவாதங்கள் உள்ள போதிலும் , வெளியிடப்படும் செய்திகளால் பாதிக்கப்படும் சகல நாடுகளது கடுப்புகளும் wikileaks மீதே குவிக்கப்பட்டுவிடுகின்றது. இதனை wikileaks தனித்தே முகங்கொடுக்க நேர்ந்தது.

இக் குறைபாடுகளை எல்லாம் நிவர்த்தி செய்யுமுகமாகத் தோற்றம் பெறுகிறதாம் OpenLeaks..wiki-leaks ன் முன்னாள் முக்கிய தூணும், முன்னாள் wikileaksன் ஊடகப் பேச்சாளருமான Daniel Domscheit-Berg புதியதொரு திட்டத்துடன் வந்திருக்கின்றார். இரகசியமான முறையில் முன்பு போலவே செய்திகளைத் திரட்டுமாம் openleaks.. ஆனால் முன்புபோல் தாமே அதனை இணையத்தில் பிரசுரிக்க மாட்டார்களாம்.. இது விடயமாக ஆர்வம் செலுத்தும் ஏனைய ஊடகங்களுடன் இணைந்து செய்திகளை வெளியிடுமாம்..wiki-leaks முன்னாள் ஊழியர்கள் சிலரும் இவருடன் இணைந்து பணியாற்ற முன்வந்துள்ளார்களாம்.wikileaks நிறுவுனர் Julian Assange முடிவுகள் எடுக்கையில் வெளிப்படைத் தன்மையின்றிச் செயற்பட்டதாகவும் தான் அவ்வாறு செயற்படப்போவதில்லை எனவும் அவர் ஊடகவியலாளர் மாநாட்டில் தெரிவித்திருக்கின்றார் .. openleaks ற்கான ஆரம்பக் கட்டப் பணிகளை ஏற்கனவே ஜேர்மனியில் ஆரம்பித்துவிட்டார்களாம்..

wiki-leaksற்கு மாற்றாக open-leaks வீறு கொண்டெழுகிறதா இல்லை பிசுபிசுத்துப் போய்விடுமா..?? காலம் தான் பதில் சொல்லும்..

openleaks பற்றி WikipediAவில்..

எண்ணத்தெரிந்தவர்கள் மற்றும் எண்ணத் தெரியாதவர்கள் என உலகத்தில் உள்ளவர்களை மூன்றாக வகைப்பட்டுத்த முடியும்.

2010-12-10T13:09:00.003+05:30

உலகவரலாறு வழமைபோன்று தனது பிடிவாதமான பாதையில் சற்றும் தளராமல் மனிதர்களைப் பணயமாக வைத்து போய்க்கொண்டிருக்கிறது. இஸ்லாமின் இறைத்தூதரின்(முகம்மது நபி- Peace be upon him) உருவத்தை காட்டுன்னாக(Cartoon) வரைந்து 'ஒருவிதமான' பாராட்டு மற்றும் எதிர்ப்பை பெற்றுக்கொண்ட டென்மார்க் கேலிச்சித்திரஒவியர் தற்போது அவை எல்லாவற்றையும் உள்ளடக்கிய புத்தகம் ஒன்றை வெளியிட உள்ளாராம். ஐக்கிய இராச்சியத்திற்கு விஐயம் மேற்கொண்ட பாப்பாண்டவர் உலகத்தில் மதச்சார்பற்றவர்களின்(Secular) ஆக்கிரமிப்பிற்கு எதிராக ஒன்றுதிரளவேண்டும் எனக்கூறி, "தான் கண்ட நாசிசத்தை" தன் கூற்றுக்கு ஆதாரமாகக் காட்டி, அரியணையிலுள்ளோர் ஆட்சிபுரிவோரிடம் தனது மனக்கவலையை கொட்டித்தீர்த்துள்ளார். இன்றைய யூதர்களுக்கு சமாதானப் பேச்சுவார்த்தைகளில் நம்பிக்கையும் அக்கறையும் இல்லையாம். அமெரிக்கா இருக்கும்போது, ஏன் இருக்கவேணும் என திண்ணையில் இருக்கிற நீங்கள் நினைக்கிறது புரியுது எனக்கு.

அது சரி மனிதர்களை பணயமாகவைத்து என்றால் எப்படி? என்கிற உங்கட கேள்வி நியாயம்தான்.
கேணல் சண்டர்ஸ் (அதுதாங்க KFC கடையிலுள்ள தாத்தா) யாரென்பது இன்றுள்ள அமெரிக்கச் சிறுவர்களுக்குத் தெரியாதாம் ஆனால் KFC என்றால் தெரியாதவர்கள் இல்லையாம். 11 வகையான மூலிகைகளையும் சில வசனைத்திரவியங்களையும் கொண்டு எப்படி வளர்த்த கோழியை "வதைத்து" பின் வறுத்து KFC செய்வது என்பதை வரிக்குவரி ஒரு காகிதத்தில் அதுவும் பென்சிலால கைப்பட எழுதிப்போட்டு, அந்த ஒரேயோருககிதத்தையே மூலதனமாகக் கொண்ட நிறுவனம் தான் KFC. இருவருக்குமட்டுமே தெரிந்த இருட்டுச் சுரங்கம் ஒன்றின் அடிவாரத்தில் வைக்கப்பட்டிருகும் காகிதத்தின் துலக்கம் மங்குகிறதாம் என்பது KFCஇன் தற்போதைய கவலை. ஆனால் 60வயதினை கேணல் சாண்டர்ஸ் எட்டும்வரை ஒரு கடைக்காரரும் அவருடைய முறையை எற்றுக்கொள்ளவுமிலையாம், ஏறெடுத்துப் பார்க்கவுமில்லையாம் என்றால் பாருங்களேன்.அதேவேளை கலாநிதி ஐயன்ஸ்டைனை எடுத்துக்கொள்ளுங்கள், பெளதீகத் தத்துவஞானி. சார்பியல் கோட்பாட்டினை (சத்தியமாக எனக்கு எதுவும் தெரியாது) இந்த உலகத்துக்கு அறிமுகப்படுத்தினார். வாயைபிளந்த விஞ்ஞானிகள் அவருடைய பிறந்ததினங்களில் எதாவது அதிசயம் நடக்கும் என இன்றும் நம்புகிறார்களாம். ஆனால் "சார்பியல் கோட்பாட்டிற்காக" அவருக்கு நோபல் பரிசு(Nobel Prize) வழங்கப்படவில்லை மாறாக "ஒளி மின் ஆற்றல்(Photovoltaic Effect)" தொடர்பான ஒரு சிறுவிடையத்துக்கு மட்டுமே வழங்கப்பட்டுள்ளது.

இப்படி பலகதைகள்தான் இன்று வரலாற்றை சிருஸ்டித்துக்கொண்டு இருக்கிறது. எனவே இந்த வரலாற்றை விடுவோம். ஒரு உண்மையான மனிதனுக்கும் அவனுடைய அறிவியல்ஞானத்திற்கும் இடையேயான மென்மையான தொடர்புதான் அவனுடைய உண்மையான வரலாறு என்பது எனது நிலைப்பாடு, அது எற்றுக்கொள்ளப்படுகிறதா அல்லது மற்றப்படுகிறதா என்பது தேவையில்லாதது. யாராவது மேலுள்ள படத்தை விளங்கிக்கொள்ள முடிகிறதா எனப்பருங்கள். அச்சடிக்கும்கருவியின்(Printer) காபன் தூள்(Toner)தான் அது. படுபயங்கரமான பச்சைவீட்டுவிளைவு ஊக்கி என்பது உங்களுக்குத் தெரியும். காபன் தூளில் என்ன மாற்றம் செய்தார்களோ தெரியவிலை பழைய காபன் தூள்மாதிரி இந்த புதிய காபன் தூள் இல்லையாம் ஆனால் ஒரேவிதாமான நேர்த்தியான அச்சாம்... என்னால நம்பவே முடியல, இந்தக் காபன் தூளின் வரலாற்று மாற்றத்தை. நீங்களும் உங்கட நியாயப்படுகளைச் சொல்லவாறமாதிரித் தெரியுது ஆனாலும் தலைப்பை ஒருதடவை வாசியுங்கோ... அப்ப தெரியும் நான் வரலாற்றின் எந்தப்பக்கம் என்று..

இது Facebook உருவான கதை..

2010-12-08T12:36:00.002+05:30

The Social Network.. .

உலகின் மிக இளவயது செல்வந்தர் Facebook நிறுவுனர் Mark Zuckerberg இன் கதை இது..facebook இன் ஆரம்பகாலம் பற்றி மிக சுவாரஷ்யமாகவே பேசுகின்றது..ஆச்சர்யம் என்னவென்றால் நண்பர்களிடையே இணைப்பை உருவாக்குவதையே அடிப்படையாகக் கொண்ட facebook, அதன் உருவாக்கம் மற்றும் பிரமாண்ட வளர்ச்சியின்போது நண்பர்களைப் பிரித்தது தான்..அங்கொன்றும் இங்கொன்றுமாக நான் கேள்விப்பட்டிருந்த Facebookஇன் தோற்றம் பற்றிய கதையை ஒரு வரிசையாக்கி காரணகாரிய தர்க்கங்களை ஊகிக்கக் கூடியவாறானதோர் நிலைக்கு இட்டுச் செல்கின்றது இப்படம்.. தற்செயலான மில்லியனர் என சிலரால் விமர்சிக்கப்படுவார் Mark Zuckerberg.ஆனால் facebookன் உருவாக்கத்திற்காக அவரின் மிகக் கடுமையான உழைப்பை தெளிவாகக் காட்டுவதில் எந்த இடத்திலும் பின் நிற்கவில்லை இப் படம்..

Erika எனும் பெண் நண்பியுடனான வாக்குவாதமும் அதனால் ஏற்படும் பிரிவுடன் ஆரம்ப்பிக்கிறது படம்..இவ் வாக்குவாதத்தால் கடுப்படையும் Mark , மதுபோதையில் தாறுமாறாக நண்பியை விமர்சித்து blog பதிவு போட்டவாறே, ஒரே இரவில், சக மாணவிகளை எழுந்தமானமாக இருவர் இருவராக தெரிவுசெய்து "Who looks more hotter in these two?” என தரப்படுத்தும் facemash எனும் வலைத்தளமொன்றை உருவாக்குகின்றார்.இதற்காக பல்கலைக்கழக வலையமைப்பை உடைத்து அங்கிருந்து இரகசியமாக சக மாணவிகளது புகைப்படங்களைப் பெற்றுக்கொள்கிறார்.Mark ன் நண்பர் Eduardo தான் சதுரங்க வீரர்களை தரப்படுத்தும் முறையை சிறிய தயக்கத்தின் பின்னர் இங்கு மாணவிகளை தரப்படுத்த உபயோகிக்க உதவுகின்றார்.இவ்வாறு வலுப்பெறுகிறது Mark,Eduardo நட்பு..

தொடர்ந்து என்ன..? மாணவர்கள் சும்மா இருப்பார்களா? 22000 hits ஆரம்பித்து வெறும் இரண்டே மணி நேரத்தில்.. விடிகாலை நான்கு மணிக்கு பல்கலை இணையம் மிகையான இணைய பாவனை நெரிசலால் முடங்குகின்றது..

பிறகென்ன பல்கலை முகாமையிடம் நேரடி விசாரணை தான்.. விசாரணையினிடையே Mark கூறுவார்.. பல்கலை இணைய வலையமைப்பை உடைக்கக் கூடிய ஓட்டைகளை இனங்காண உதவிய தன் மீது கரிசனை காட்டவேண்டுமென.. சூடான விவாதம் தொடரும்.. இறுதியில் ஆறு மாத நன்னடத்தை எச்சரிக்கையுடன் mark விடுவிக்கப்படுவார்..

வெளியில் தன் தவறை உணர்ந்தவனாக வந்தபோதும்..நண்பன் Eduardo விடம் கேட்பார்.. “Doesn't anybody has some sense of humour..?" இதனூடக Markஇன் அப்போதைய மனநிலையை எளிதாக எடுத்துக்காட்டியுருப்பார் இயக்குனர்.

இச்சம்பவத்தின் பின் markஇன் image கடுமையாகவே damage ஆகி இருக்கும்..

தொடர்ந்து vinklevoss சகோதரர்கள் Mark இடம் அறிமுகமாகி தங்கள் harverd Connection வலையமைப்பைப் பற்றிய தங்கள் ideaவை விளங்கப்படுத்தி ,அதனை செய்வதற்காக markஉடன் வர்த்தகம் பேசுவார்கள்..சம்மதிப்பான் mark..

இதன்போது mark முன்பு செய்திருந்த கேட்பவர்களின் சுவையை உணர்ந்து கொள்லத்தக்க MP3 player யை Microsoft வாங்க முன்வந்தபோதும் mark அதனை இலவசமாக இணையத்தில் தரவேற்றியது பற்றிய ஓர் உரையாடல் தொடரும். இங்கே பணமீட்டுவது மட்டும் தான் markஇன் இலக்கு அல்ல என்பதைக் காட்ட முற்படுவார் இயக்குனர்..

பின்னர் Mark, Eduardo உடன் இணைந்து 70:30 இலாப உடன்பாட்டுடன் the Facebookஎனும் சமுக வலையமைப்பை உருவாக்குவதில் vinklevoss சகோதரர்களுக்குத் தொடர்ந்து சாக்குப் போக்குக் கூறியவாறே மும்முரமாக இறங்கி விடுவான்..

தொடர்ந்து கதை உச்ச வேகத்தில் பயணிக்கும்..

thefacebook அறிமுகமாகும்..
எதிர் பார்ப்பதை விடவும் விரைவாக பிரபலமாகும்..

vinklevoss சகோதரர்கள் தமது idea திருடப்பட்டதாக mark உடன் கணவான் யுத்தம் புரிய முனைவார்கள்..
அதில் vinklevoss சகோதரர்களுக்கு வெற்றி கிடையாது..

இன்னுமோர் பிரபலம் Sean parker உடன் அறிமுகம்..

Mark Sean parkerன் உரையாடலில் கவரப்படல்.. Eduardo , Sean பனிப்போர் ஆரம்பம்..

the face book வளர்ந்துகொண்டேயிருக்கும்..

the facebook, face book ஆக மாறும்..
.
facebookகும் உச்ச வேகத்தில் வளர்ந்து கொண்டிருக்கும்..

Sean, Eduardo பனிப்போர் உச்சமடையும்.. Eduardo குழிபறிக்கப்பட்டு facebookஇலிருந்து வெளியேற்றப்படுவான்..

vinklevoss சகோதரர்கள் முக்கிய படகோட்டல் போட்டியொன்றில் தோல்வியடைவார்கள்.. அந் நேரத்தில் facebook ஐரோப்பா வரை பிரபலமடைந்திருக்கும்..மனமுடைந்து போகும் vinklevoss சகோதரர்கள் தங்கள் idea திருடப்பட்டதாக Mark ற்கு எதிராக நீதிகோரல்..

Eduvardoவும் தான் ஏமாற்றப்பட்டதாக நீதி கோரல்..

எல்லாமே ஒரு புள்ளியில் சந்திக்க... விசாரணை..
அவரவர் தங்கள் தங்கள் தரப்பு நியாயங்களை உணர்வு பூர்வமாக விபரிக்க விசாரணை சூடு பிடிக்கும்..

Look, a guy who builds a really nice chair ,doesnt owe money to everyone who ever build a chair.. !!??

ஆர்ப்பாட்டமில்லாமல்,அமைதியாக அருமையாக இயக்குனர் David Fincher கதையை நகர்த்தியிருப்பார்..எந்த இடத்திலும் சலிப்புத்தட்டாது..அமைதியான அளவான,அழகான பின்ணணி இசை..நடிகர்களின் அமைதியாக ஆர்ப்பாட்டமில்லாத நடிப்பு..

இறுதியில் தன் முன்னாள் நண்பிக்கு friend request அனுப்பிவிட்டு அடிக்கடி refresh செய்து முடிவுக்காக Mark Zuckerberg காத்திருக்க படம் முடிகிறது..The social network.. காட்சிகளிடையே சொன்ன செய்திகளிற்கிடையே ஒரே இரவில் பணக்காரனாகத் துடிக்கும் இன்றைய இளைஞர்களுக்கு பல செய்திகளைச் சொல்லாமல் சொல்லியிருக்கிறது..

இது நிஜ Mark Zuckerbergன் நேர்காணல் ஒன்று.. இத் திரைப்படம் பற்றி Mark Zuckerberg கை மெலிதாகக் கலாய்த்திருப்பார்கள்..

Facebookஇன் புதிய profile..LinkedInற்கு ஆப்பா..??

2010-12-06T10:25:00.006+05:30

நேற்றிரவு Facebook புதியதொரு profile view வை அறிமுகப்படுத்தியுள்ளது.இன்று காலை பெரும்பாலான ஆங்கில தொழிநுட்பத் தளங்களில் இது தான் செய்தி.

இப் புதிய மாற்றத்தின்போது அவர்கள் இரு விடயங்களை முக்கியமாகக் கவனத்திலெடுத்துள்ளார்கள்.முதலாவது விடயங்களைச் சுவாரஷ்யமான முறையில் காட்சிப்படுத்தல், மற்றையது பயனர்கள் அடிக்கடி உபயோகிக்கும் விடயங்களை முன்னிலைப் படுத்தி எளிதில் அடையச் செய்தல்.இதற்காக profile பக்கத்தை அணுஅணுவாக ஆராய்ந்திருக்கிறார்கள். உதாரணமாக view more photos முன்பெல்லாம் முக்கியத்துவம் குறைந்த பல இணைப்புகளுடன் இருந்தது.அதனை இப்போது சரி செய்து இருக்கிறார்களாம்.

பிரதான மாற்றங்களாக உங்கள் பிறந்தநாள்,தொழிலிடம்,வசிப்பிடம் போன்ற தகவல்களை முன்கொண்டுவந்திருக்கிறார்கள்.அத்துடன் மிக அண்மையில் உங்களின் பெயரிடப்பட்ட புகைப்படங்களினை வரிசையாகக் காட்சிப்படுத்தும் வசதியினை ஏற்படுத்தியிருக்கிறார்கள்.அங்கே நீங்கள் விரும்பாத புகைப்படங்களை மறைக்கும் வசதியினையும் ஏற்படுத்தியிருக்கிறார்களாம்.Tab வசதியினை profile படத்தின் கீழ்கொண்டுவந்திருக்கிறார்கள்.

சுவாராசியமான மாற்றம் info பகுதியில் ஏற்படுத்தப்பட்டுள்ளது.உங்கள் கடந்த கால ,நிகழ்கால தொழில் வழங்குனரின் விபரங்கள்,நீங்கள் முன்பு,தற்போது பணியாற்றிய project விபரங்கள்,உங்களுடன் பணியாற்றியோர் விபரங்கள் என பல புதிய விபரங்களை இணைத்துள்ளார்கள்.இவற்றின்மூலம் உங்கள் face book profile info பக்கம் ஏறக்குறைய ஓர்online resume போன்றதொரு தோற்றப்பாட்டினைக் கொடுக்கும்.இது அண்மைக் காலமாக தொழில்சார் profile உருவாக்குவதை நோக்காகக்கொண்டு துரிதமாக வளர்ந்துவரும் LinkedIn ற்கு ஆப்படிக்கும் முயற்சியாகவே பரவலாகப் பேசப்படுகிறது. ஏனெனில் புதிதாக இங்கு facebook profile info வில் இணைக்கப்பட்ட விடயங்களை linkedIn முதலிலேயே சிறிது மாறுதலான வடிவில் வழங்கிக் கொண்டிருந்தது.எனினும் இவ் ஆப்படிக்கும் முயற்சியில் facebook எந்தளவு வெற்றி பெறுகின்றது என்பதற்கு காலம் தான் பதில் சொல்லவேண்டும். facebookகை ஓர் தொழில்சார் தளமாகவும் பார்க்க எவ்வளவு பேர் முன்வருகின்றார்கள் என்பதில் தான் இது தங்கியுள்ளது.

தற்போதைக்கு இப் புதிய profileஐ நீங்கள் விரும்பினால் உடனடியாக நீங்களாகவே Activate செய்யும் வசதியை வழங்கியிருக்கிறார்கள்.ஆனால் புதிய profileற்கு மாறிய பின்னர் old is gold என்று பழைய profile ற்கு மாற எண்ணுபவர்களுக்கு ஏமாற்றம் தான் மிஞ்சும்.இங்கே சென்று நீங்கள் புதிய profileற்கு மாறிக்கொள்ளலாம்.ஆனால் சிறிது சிறிதாக அவர்களே அடுத்த வருட முற்பகுதியிலே அனைவரையும் இப் புதிய profile க்கு மாற்றிவிடக்கூடும்.

உத்தியோகபூர்வ தகவல் அறிய இங்கே சொடுக்குங்கள்.. ;)

ம்..

2010-12-03T00:28:00.003+05:30

வெள்ளாட்டு மந்தைக் கூட்டம்..

அமைதியாய்ச் சிங்கம்..

நாதியற்று நடுத்தெருவில் நரிகள்..

முள்வேலியற்ற முகாம்கள்

மாதிரிக் கிராமங்கள்..

யாருமற்ற சிறைச்சாலை

தொல்பொருட்சாலை..

சமச் சீரான தராசு..

பீரங்கியில் ஊங்சல்..

குதூகலமானதோர் குடும்பம்..

தமிழ் பேசும் கட்சிகளின் கூட்டு..

படுகொலைச் செய்தியேயில்லாத நாளிதள்..

ஆர்ப்பாட்டங்களேயற்ற தலைநகரம்..

தொடர்ந்து அலறும் தொலைபேசி..

கலைக்கப்பட்டது தூக்கம் ..

விழிகளின் ஓரமாய் வடியும்
ஒரு துளி கண்ணீர்..

கித்துல்கல வில் ஓர் மறக்கமுடியாத சாகச சுற்றுலா அனுபவம்....

2010-11-29T20:41:00.008+05:30

சாகசத்திற்கு தயாராக நண்பர் குழாம் :D

எங்கள் யாழ் இந்து 2005 மாணவர்கள் எல்லோரும் ஒன்றுணைந்து கடந்த வருடம் முதல் வருடாந்தம் ஒரு நாள் சுற்றுலாவை ஒழுங்குசெய்து வருகின்றோம்.இம்முறை கித்துள்கல சென்று White water rafting செய்வதாகத் திட்டமிட்டிருந்தோம். முன்பொருமுறை கேதா அண்ணா ஒழுங்கு செய்த கித்துல்கல சுற்றுலா பற்றிய முன்னாள் பதிவர் ;) புல்லட்டின் பதிவொன்றை வாசித்ததிலிருந்து நானும் கித்துல்கல செல்வதற்கான வாய்ப்பை எதிர்பார்த்திருந்தேன்.இதற்கமைய குறுகிய கால முன் அறிவித்தலுடன் முப்பத்திரண்டு நண்பர்களைத் திரட்டி நேற்று கித்துல்கல நோக்கிய எமது சாகசப் பயணத்தை ஆற்றியிருந்தோம்.இம் முறை யாழ்ப்பானத்திலிருந்தும் நண்பர்கள் வந்து இணைந்து கொண்டிருந்தார்கள். பழைய பாடசாலைக்கால நினைவுகளைக் கிளறி ஒரே குறும்பும் கும்மாளமுமாக ஏறக்குறைய இரண்டரை மணி நேரப் பயணத்தின் பின்னர் கித்துல்கலவை அடைந்தோம்.

ஆற்றங்கரையில் படகோட்டும் நண்பர்கள் :P

அங்கே ஆறு அண்மைக்கால பெரு மழையாலோ என்னவோ கரைபுரண்டு ஓடிக்கொண்டிருந்தது. எங்களுக்கு முன்னமே சில சுற்றுலாப் பயணிகள் பயணத்தை ஆரம்பித்திருந்தார்கள். முதலில் நெறிப்படுத்துனர்கள் துடுப்பு வலிப்பது பற்றியும் அதற்காக அவர்கள் வழங்கும் கட்டளைகளையும் கடைப்பிடிக்கும் நெறிமுறைகளையும் எங்கள் அனைவருக்கும் விளங்கப்படுத்தினார்கள்.

அரைகுறை சிங்களம் தெரிந்த நண்பர்களெல்லாம் அவர்களது சைகைகளைத் தமிழில் மொழிபெயர்த்து ஏனைய நண்பர்களுக்கு தங்கள் சிங்களப் பாண்டித்தியத்தை முண்டியடித்து வெளிப்படுத்தினார்கள் ;). அப்போது நெறிப்படுத்துனர் பாறைகள் நிறைந்த பாரிய அலைகள் போல ஆறு கரை புரண்டோடும் ஓர் அலைக்கிடங்கைக் காட்டி இது போன்று மூன்று பாரிய அலைக்கிடங்குகளைக் கடந்து ஒரு ஐந்து கிலோ மீற்றர் தூரம் பயணிக்க வேண்டும்.அவ் இடங்களில் கொஞ்சம் அவதானமாகக் கடந்தால் பயமில்லைஎன்று வெகு சாதாரணமாகக் கூறிய போதே எங்கள் நண்பர்கள் பலரது இதயத் துடிப்பு வீதம் பலமடங்காக எகிற ஆரம்பித்தது.ஆனால் நெறிப்படுத்துனர்கள் அத்தோடு நிறுத்தாமல் ஆற்றுக்குள் வீழ்ந்துவிட்டால் காப்பாற்றும்வரை எவ்வாறு நடந்து கொள்ள வேண்டுமென்று அறிவுறுத்தல்களை வழங்க ஆரம்பித்தார்கள்.ஏதோ சாதாரண படகோட்டல் என்று சம்மத்தித்து வந்திருந்த நண்பர்கள் தங்கள் உயிர் வாழ்வின் நிலைத்திருப்பின் அவசியத்தை வலியுறுத்தி செல்லமாகக் கடிந்து கொள்ள ஆரம்பித்தார்கள்..எல்லோரது கவனமும் இப்போது உயிர்காப்புக் கவசத்தையும்,தலைக்கவசத்தையும் இறுக்கமாகத் தங்களுடன் பிணைத்துக் கொள்வதிலேயே தீவிரமாகத் திரும்பியிருந்தது.

ஒரு எட்டுப் பேரை முதலாவது படகில் ஏறுமாறு பணித்தார் நெறிப்படுத்துனர்களில் ஒருவர்.நண்பர்களிற் சிலர் முன்னாலே சென்று தங்களை நெருக்கடிக்குள் மாட்ட விரும்பாது நைசாக நழுவ,அழைத்துக் கொண்டு சென்றதால் தப்பி ஓட முடியாது நானும் நிரஞ்சனும் முதலாவது படகில் ஏதோ அசட்டுத் தைரியத்துடன் ஏறி அமர்ந்து விட்டோம். :) பாடி எவ்வளவு ஸ்ரோங்காய் இருந்தபோதும் எங்கள் பேஷ்மன்ற் கூட கொஞ்சம் வீக்காய் இருந்ததை யார் தான் அவதானித்தார்களோ தெரியாது :P .எங்கள் படகு பயிற்சிப் பயணத்தை ஆரம்பிக்கையில் என்னோடு இருந்த நண்பனொருவன் இஷ்ட தெய்வத்தையெல்லாம் பிரார்த்தித்துவிட்டு துடுப்பை வலிக்க ஆரம்பித்தான்.எங்கள் படகு அவ்விடத்திலே ஒர் பயிற்சிப் பயணத்தை ஆற்றி வர ஏனைய நண்பர்கள் யாவரும் நான்கு படகுகளில் ஏறி சாகசப் பயணத்திற்குத் தயாராயிருந்தார்கள்.இப்போது எல்லோரும் இயல்பு நிலைக்குத் திரும்பியிருந்ததை அவர்களிடமிருந்து வந்த உற்சாகக் கூ ஒலியும் , மிக வேகமான துடுப்பு வலிப்பும் காட்டியது.

எங்கள் படகு முன்னால் செல்ல பின்னாலே ஏனைய மூன்று படகுகளும் பின்தொடர எங்கள் சாகசப் பயணம் ஆரம்பித்து சிறிது தூரம் செல்ல நெறிப்படுத்துனர் முதலாவது அலைக்கிடங்கு வருவதைக் காட்டி அதற்கேற்றவாறான சைகைகளைக் குறிப்பிட்டார். பாறைகளிடையே எங்கள் படகு ஏறிப் பாய்ந்து அலைகளுக்கிடையே அலையாடி அதனைக் கடக்கையிலே நாங்கள் அனைவரும் முழுவதுமாகவே குளித்திருந்தோம். சற்றுத் தூரம் கடந்து சென்று ஏனைய படகுகளில் வந்த நண்பர்கள் அலைக்கிடங்கைக் கடக்கும் அழகைக் கண்டு ரசிக்கையில் தான் நாங்கள் எவ்வாறு அந்த அலைக்கிடங்கைக் கடந்தோம் என்பதை அசை போட்டுப் பார்க்கக் கூடியதாயிருந்தது. இவ் அலைக்கிடங்குகளைக் கடக்ககையில் ஒரு திகில் கலந்த சந்தோச கூ ஒலியை சகலரும் அவர்களை அறியாது எழுப்பியது தான் ஆச்சரியப்படத் தக்க ஒற்றுமை.

ஓர் அலைக்கிடங்கை வெற்றிகரமாகக் கடந்ததும் அடி மனதிலிருந்த சகல பயமும் நீங்கி , எல்லோரும் ஓர் அருட்டப்பட்ட குதூகலமான மனநிலையில் இருந்ததோடு மட்டுமல்லாமல் அடுத்த அலைக்கிடங்கு எப்போது வரும் என ஆவலோடு எதிர்பார்த்திருக்கவும் ஆரம்பித்தார்கள்.இவ்வாறே அளவு கடந்த குதூகலத்துடன் எங்கள் பயணம் தொடர்ந்தது.அடுத்த அலைக்கிடங்கையும் வெற்றி கரமாகக் கடந்து வந்து நண்பர்களது படகுகள் அவற்றில் மூழ்கி எழுந்து அலைகளில் எழுந்து கடப்பதை மயிர் கூச்செறிய ரசித்தவாறிருக்கையில்தான் அந்த சம்பவம் நிகழ்ந்தது. பாறைகளூடு ஊடுருவி அலையில் அடிக்கப்பட்ட படகொன்று ஒரு பாறையுடன் மோத படகு கவிழ்ந்தது.மூன்று நண்பர்கள் ஆற்றினிடையே இருந்த பாறையொன்றில் அலைகளிற்கிடையே உடும்புப் பிடியாகப் பிடித்துத் தொங்கிக்கொண்டிருந்தார்கள்.ஏனைய ஒருவன் மிக வேகமாக ஆற்றின் வேகத்தில் அள்ளுண்டு செல்லப்பட்டுக் கொண்டிருந்தான்.எல்லாமே கண் இமைக்கும் நேரத்தில் நடந்து முடிந்தது.

அதற்கிடையில் அந்த படகில் வந்த நெறிப்படுத்துனர் சுதாகரித்துக் கொண்டு கவிழ்ந்த படகை நிமிர்த்தி சிலரை படகில் ஏற்றியிருந்தார்.ஏனைய மூன்று படகில் இருந்த நெறிப்படுத்துனர்களும் சிறிதும் பதறாது வெகு இயல்பாக நிலைமையை அவதானித்து அங்கிங்கு சிதறித் கிடந்த நண்பர்களை நோக்கி எங்களை படகைச் செலுத்தச் செய்துகொண்டிருந்தார்கள். ஒருவாறாக சிலரை நாங்கள் காப்பாற்றி குண்டுக் கட்டாகத் தூக்கி எங்கள் படகுகளில் போட்டுக்கொண்டிருந்தோம்.அவர்களில் மிகவும் மிரண்டு போய் தத்தளித்துக்கொண்டிருந்த நண்பன் நாங்கள் அருகில் செல்கையில் ஹெல்ப் மச்சான் ஹெல்ப் என்று அந்த அபாய நிலையிலும் ஆங்கிலத்தில் கூக்குரலிட்டான்.இதற்கிடையில் நீச்சல் தெரிந்த நண்பன் ஒருவன் எங்கள் படகை நோக்கி நீந்தி வந்து சேர்ந்திருந்தான். இவ்வளவு நடந்தும் அந்த பாறையில் உடும்புப் பிடியாகத் தொங்கிக் கொண்டிருந்தவர்கள் தொங்கியவாறேயிருந்தார்கள். அவர்களைக் கையைவிட்டுவிட்டு ஆற்றினோட்டத்தில் வந்தால் நாங்கள் காப்பாற்றிக் கரை சேர்க்கலாம் என்பதால் கையைவிட்டுவிடும்படி நாங்கள் பலதடவை கத்தியும் அவர்கள் விடுவதாயில்லை. பின்னர் அவர்கள் தங்கள் கைப்பலத்தை இழந்தோ ஏதோ ஒருவாறு ஆற்றுடன் அடித்துச் செல்லப்பட்டு வரலாயினர். இப்பால் படகில் காத்துக் கொண்டிருந்த நாம் ஒவ்வொருவரை நோக்கி படகை வலித்துச் சென்று அவர்களை தூக்கி எங்கள் படகுகளில் ஏற்றலானோம்.அவர்களில் ஒருவன் வேகமாக அடித்துச் செல்லப்படுவதைக் கண்ட ஏலவே கவிழ்ந்த படகிலிருந்து நீந்தி வந்தேறிய நண்பனொருவன் ஏதோ உள்ளார்ந்த உந்துகையில் அவனை மீட்பதற்காக மீண்டும் நீருக்குள் பாய்ந்தான். அப்போதுதான் எங்களோடிருந்த நெறிப்படுத்துனர் சொன்னான்.. தங்களுக்கு என்ன நீந்திச் சென்று காப்பாற்றத் தெரியாதா ? வீழ்ந்தவர்களுக்கு இதுவொரு திகிலான அனுபவம்.. உங்களைக் கொண்டே படகை வலிக்கச் செய்து அவர்களை மீட்கச் செய்தால்த் தானே உங்களுக்கும் மறக்க முடியாத அனுபவமாய் அது அமையும் என்றும்.. லைவ் ஜக்கெற், ஹெல்மட் எல்லாம் போட்டுள்ள நிலையில் எந்த அபாயமும் இல்லை எனவும் கூறினான்.. அத்துடன் அங்கு இதெல்லாம் தினமும் நிகழ்வது தான் எனவும் ,இதெல்லாம் சகஜம் என்றும் கூறியபோது ஏனோ வடிவேலின் நகைச்சுவை தான் நினைவிற்கு வந்து தொலைத்திருக்க வேண்டும்..ஒருவாறு எல்லோரையும் மீட்டெடுத்த பெருமையுடன் அடுத்த அலைக்கிடங்கையும் கடந்து பயணத்தைத் தொடர்ந்தோம்.

விருதுகள் பல பெற்ற முன்னர் எப்போதோ எடுத்த ஆங்கிலப்படத்திற்காக போடப்பட்ட பாலத்திற்கான சுவடுகளைப் பெருமையுடன் காட்டினான் எங்களுடன் வந்த நெறிப்படுத்துனர்.தொடர்ந்து அமைதியான எந்த சலசலப்புமில்லாத ஆற்றின் பகுதியை வந்தடைந்திருந்தோம்.அங்கே குதித்து நீந்தலாம் என்றது தான் தாமதம் பலர் ஏற்கனவே திகிலில் உறைந்து போயிருக்க சிலர் குத்திகலாயினர். கொஞ்சம் கொஞ்சமாக இந்தத் தொகை அதிகரிக்கலாயிற்று.என்ன கொடுமை என்றால் அந்த இடத்தில் கூட கால் நிலத்தில் முட்ட முடியாத ஆழம். நம்மில் பலர் ஒருவாறு படகைப் பிடித்தவாறும்,உயிர் காப்பு அங்கியின் துணையுடனும் மிதக்கலானோம். கவிழ்ந்த படகிலிருந்த நண்பர்களிடம்(வழமைக்கு அவர்கள் ஏற்கனவே திரும்பியிருந்தார்கள்) அவர்களது அனுபவத்தைக் கேட்பதில் நாமெல்லாம் முந்தியடித்தோம்.பாறையில் உடும்புப் பிடியாகத் தொங்கியவர்களை நாங்கள் கையை விடுமாறு கூறக் கூற தொங்கிக்கொண்டிருந்ததைப் பரிகாசம்செய்ய அவர்கள் அதன் கடினத்தை எமக்கு புரிய வைக்குமுகமாக தன் நிலை விளக்கமளித்தனர். அதிலிருந்த நண்பனொருவன் தனது தொந்தி பாறையில் கொழுவுப்பட்டுக் கொண்டதாகவும், அதனால் தனக்கு அதில் தொங்குவது பெரிய கடினமாயிருக்கவில்லை எனவும், கூறி தன்னைப்போன்று சற்றுப் பருத்த உடலமைப்பு இருந்தால் ஆபத்திற்குதவும் என்றும் கூறி அனைவரையும் சிரிப்பிலாழ்த்தினான்.இவர்களின் அனுபவப் பகிர்வின் பின்னர் பல பேர் தங்கள் படகு கவிழவில்லையே என ஆதங்கப்படத் தொடங்கினர்.பின்னர் அனைவரும் ஒருவாறு ஒருவரை ஒருவர் குண்டுக் கட்டாக படகினுள் தூக்கிப் போட்டு கரையை அடைந்தோம்.

வாழ் நாளில் மறக்கவே முடியாத,கொடுக்கும் பனத்திற்கு பயனுள்ள ஓர் சாகச அனுபவமுள்ள சுற்றுலா சென்ற திருப்தியுடன் இரவு வீடு திரும்பினோம். நீங்கள் சாகசம் மிகு சுற்றுலா செல்ல விரும்பினால் உங்களுக்கு எந்தத் தயக்கமுமின்றி கித்துல்கலவை நாங்கள் சிபாரிசு செய்கின்றோம். யாம் பெற்ற (இ/து)ன்பம் பெறுக இவ் வையகம்.. :P

Facebookக்கு சரியானதோர் மாற்றுத்தேர்வு..!?

2010-11-24T21:39:00.004+05:30

Facebook பாவனையாளர்களின் சொந்த விடயங்களைப் பகிரங்கப்ப்டுத்துகின்றது என்ற விவாதம் உச்சக்கட்டத்தை அடைந்த தறுவாயில் , ”தனது சொந்தத் தகவல்களை சமூகவலைத்தளங்களில் தனது சொந்தக்கணனியிலேயே பேணுதல் “ என்ற கோசத்துடன்

நான்கு பல்கலை மாணவர்களால் அறிமுகப்படுத்தப்பட்டதே இந்த Diaspora. ஆனால் இதற்குக் கிடைத்த வரவேற்பு ஏதோ நான்கு பொடிப்பசங்களின் சிறுபிள்ளை வேளாண்மை வீடு வந்து சேராது என கவனிக்காமல் விட்டு விடக் கூடியதாயிருக்கவில்லை.ஏற்கனவே Mark Zuckerberg

இளம் வயதிலேயே Facebook ஊடாக சாதித்திருந்தமையும் ஒரு காரணமாயிருக்களாம். Diaspora வின் ஆரம்ப முன்னெடுப்புகளிற்காக 39 நாட்களில் 10000 அமெரிக்க டொலர்களைத் தன்னார்வத் தொண்டர்களிடமிருந்து இணையமூடாகத் திரட்டுவடென்ற இலக்கில் களம் இறங்கினார்கள். ஆனால் நடந்ததை அந்த நான்கு இளைஞர்களுமே எதிர்பார்த்திருப்பார்களோ தெரியாது.

வெறும் பன்னிரண்டே நாட்களில் அந்த இலக்கை அவர்களால் திரட்ட முடிந்தது.இதில் பணமிட்டவர்களில் Fred Wilson போன்ற சில பெருந்தலைகளும் அடக்கம்..அத்துடன் Diasporaவை அவர்கள் கட்டற்ற மென்பொருளாக (open source) ஆக வெளியிடவும் தீர்மானித்திருந்தார்கள்.இவை யாவும் ஒன்று சேர்ந்து உலகின் கவனம் Diasporaவின் பக்கம் திருப்பியது.

இப்போது Diasporaவை ஒரு வரையறுத்த குழுவினரிற்கு பரீட்சார்த்தமாக இவ்வாறு அறிமுகப்படுத்தியிருக்கிறார்கள்.இவ் எண்ணிக்கைய தொடர்ச்சியாக அதிகரித்துப் பரீட்சித்துப் பார்க்க அவர்கள் உத்தேசித்துள்ளார்கள்.இது சம்பந்தமான அவர்களின் உத்தியோகபூர்வ அறிவிப்பைப் பார்வையிட இங்கே சொடுக்குங்கள்.

Diasporaவின் சிறப்பம்சமாக அவர்கள் aspects என்னும் வடிவத்தை அறிமுகப்படுத்துகிறார்ளாம்.இதன் மூலம் நீங்கள் சமூகவலைத்தளத்தில் பகிரும் விடயங்களை யார் யார் பார்வையிடலாம் என்பது உங்கள் பூரண கட்டுப்பாட்டிலிருக்குமாம்.நீங்கள் உங்கள் விரிவுரையாளர்களைப்பற்றி அடிக்கும் உங்கள் கருத்துக்களை விரிவுறையாளர்கள் பார்வையிடுவதையோ,உங்கள் boss மீதான கடுப்பை நீங்கள் சமூக வலைத் தளங்களில் கொட்டித்தீர்ப்பதை உங்கள் boss பார்வையிடுவதையோ நீங்கள் விரும்பமாட்டீர்கள் தானே? இதற்காக உங்கள் கடுப்புக்களையெல்லாம் கொட்டித்தீர்ப்பதற்கு இதோ நாங்கள் இருக்கிறோம் என்று Diaspora களத்தில் இறங்கினர்கள்.ஆனால் Facebook அண்மைக்காலத்தில் அறிமுகப்படுத்திய Group முறை மூலம் இவற்றின் பெரும்பாலானவற்றை நாங்கள் பெற்றுக்கொள்ளலாம்..

ஏற்கனவே Facebook இராட்சத வளர்ச்சி பெற்று இன்றும் வளர்ந்தவாறே Google உடனான வர்த்தகப் போட்டியில் நேரடியாக இறங்கியுள்ள நிலையில் Diaspora மக்களை வேறொரு சமூகவலைத் தளத்தை நோக்கி இழுத்து வர என்ன செய்யப் போகிறது..? இவர்கள் மிகத் தாமதமாகிவிட்டார்கள் என ஒரு சாரார் கருத்துக் கூறுகையில், yahoo இணைய உலகில் வல்லரசாயிருக்கையில் Google எவ்வாறு அதிரடியாக புகுந்து தன்னை நிலை நிறுத்தியதோ அவ்வாறே Diasporaவால் முடியும் என இன்னொரு சாராரும் வாஅதாடுகிறார்கள்.இவர்கள் ஏற்கனவே facebbok google maps ல் பிரதான பங்காற்றிய பொறியியலாளர் உட்பட சிலரை தன்வசப்பாடுத்தியதால் கடுப்பாகியுள்ள Google Diaspora வினை தனது கட்டுப்பாட்டுக்குள் கொண்டுவந்து Facebookற்கு தகுந்த நெருக்கடியைக் கொடுப்பார்கள் என்று வேறு எதிர்வு கூறுகிறார்கள்..

காலம் தான் பதில் கூறும். ..

இவ் வர்த்தகப் போட்டியில் privacy மீது சமூகத் தளங்கள் அதிக அக்கறை செலுத்தப்போவது உறுதி.. எது நடந்தாலும் எங்கள் பாடு கொண்டாட்டம் தான்..

ஈழத்து எழுத்தாவணங்களை எண்ணிமப்படுத்தி ஆவணப்படுத்தும் ஓர் முயற்சி..

2010-11-18T16:38:00.002+05:30

இலங்கைத் தமிழ் மக்களின் வாழ்வை ஆவணப்படுத்தும் எந்தவொரு ஆக்கபூர்வமான முயற்சியிலும் அவர்கள் ஈடுபடுவதில்லை என்பது இன்று நேற்றல்ல நீண்டகாலமாகவே பலராலும் முன்வைக்கப்படும் ஓர் குற்றச்சாட்டு.அவ்வாறான் ஒரு சில ஆவணப்படுத்தல் முயற்சிகளும் தீயாலும் வேறும் பல காரணங்கலாலும் நாசமாக்கப்பட்டதே வரலாறு.

ஈழத்து எழுத்தாவனங்களை எண்ணிமப்படுத்தி ஆவணப்படுத்தி உலகளவிய ரீதியில் அனைவரிற்கும் இணையத்தினூடே கொண்டுசேர்க்கும் ஓர் பெரும் பணியை நூலக நிறுவனம் தனது மின் நூலகத் திட்டத்தின் மூலம் ஆற்றி வருகின்றது.இதில் குறிப்பிடத் தக்க விடயம் யாதெனில் இம் மின்னூலகத் திட்டம் இலாப நோக்கற்ற தன்னார்வ முயற்சியாக உலகெங்குமிருக்கும் தமிழ் பேசும் தன்னார்வத் தொண்டர்களின் ஒத்துழைப்புடன் சிறப்பாக நடாத்தப்பட்டு வருகின்றது.2005 ல் ஆரம்மித்த இப் பணி இன்று ஏறக்குறைய 7000 வரையான நூல்களை எண்ணிம ஆவனங்களாக தன்னகத்தே கொண்டுள்ளது. தொடர்ச்சியாக இப்பணியை அவதானித்து வருபவர்கள் அண்மைக்காலத்தில் நூல்களை எண்ணிமப்படுத்தும் பணி மிகுந்த ஆர்முடுக்கப் பட்ட நிலையில் மேற்கொள்ளப்படுவதைக் காணலம்.

”நூலகம்” எண்மிய நூலகத்தில் நூல்கள்,இதழ்கள்,பத்திரிகைகள்,பிரசுரங்கள் என ஆவண வகைகளாகவும்,எழுத்தாளர்கள், பதிப்பாளர்கள்,வெளியீட்டு ஆண்டு மற்றும் நூல்வகை போன்ற பலவாறு பகுப்பாக்கி இலகுவில் தேவையான நூல்களைப் பெற்றுக்கொள்ளத்தக்கவாறு பாகுபடுத்தியிறுக்கிறார்கள்.

ஈழத்து எழுத்தாவனங்களை எண்ணிமப்படுத்தி ஆவனப்படுத்தும் நூலக நிறுவனத்தின் இந்த முயற்சிக்குக் கைகொடுத்து உதவவேண்டியது நம் அனைவர் முன்னாலுள்ள வரலாற்றுக் கடமை.. நிறைவேற்றுமா..?

ஏதோ இருக்கிறோம்..

2010-10-31T20:56:00.004+05:30

ஏதோ இருக்கிறோம் என்று கூறிக் கூறியே
நாமும்
ஏதோ இருக்கிறோம்..

ஏதிலியாய் முட்கம்பிவேலிகளிற்டையே
நீங்கள் இருக்கையில் கூட
இங்கே ”ஏதோ இருந்தோம்”..
மரண ஓலங்கள் மனதில் ஒலிக்க..
கொண்டாட்டங்கள் காதிலொலிக்க..
”ஏதோ இருந்தோம்”..

இதோ..
சாவிற்குள் வாழ்ந்து
ஏலவே செத்த நடைப் பிணங்களெல்லாம்..
வாழ்விற்குள் செத்துக் கொண்டிருக்க..
இங்கே..
”ஏதோ இருக்கிறோம்”..

அதோ..
செத்த மாட்டின் மீது..
காகங்கள் கூட்டமாய்க் கூடி..
இறுதி அஞ்சலி செலுத்தியவாறு..
சாப விமோசனம் கொடுக்கத் தயாராகிவிட்டன..

இதோ..
நாங்கள்..
'ஏதோ இருந்து கொண்டிருக்கிறோம்"..
நாளையும் "ஏதோ இருப்போம்"..
ஏனென்றால்..
நேற்றுக் கூட இப்படித் தான்
“ஏதோ இருந்தோம்”..

நீங்கள் உபயோகிப்பது office 2007/2003 யா எனும் பிரச்சினைக்கான ஓர் தீர்வு..

2010-10-25T10:58:00.004+05:30

நீங்கள் அனுப்பும் கோப்புகள் தங்களால் வாசிக்க முடியாத வடிவில் உள்ளதாக உங்கள் நண்பர்களிடம் அடிக்கடி திட்டு வாங்குகின்றீர்களா..??

உதாரணமாக நீங்கள் MsOffice 2007 பாவனையாளராயிருக்க உங்கள் நண்பர்கள் office 2003 பாவனையாளராயிருந்தால் நீங்கள் .docx formatல் அனுப்பும் word கோப்புகளையோ .pptx format ல் அனுப்பும் கோப்புகளையோ

உங்கள் நண்பர் தனது office 2003 நிறுவப்பட்டுள்ள கணனியில் உபயோகிக்க முடியாது அவதிப்படுவார்.

உங்கள் நண்பர் office2003/ 2007யா உபயோகிக்கிறாரென்று முன்கூட்டியே உங்களுக்குத் தெரிந்திருந்தால் உரிய formatல் அனுப்ப முடியும்.ஆனால் உங்கள் நண்பர் எதனை தனது கணனியில் நிறுவியிருக்கிறாரென்று முன்கூட்டியே அறிந்திருக்க வேண்டிய தேவை இனிமேல் இல்லை. DocDroid இருக்கக் கவலை ஏன்..??

http://www.docdroid.net/

நீங்கள் DocDroidக்குச் சென்று நீங்கள் அனுப்ப வேண்டிய கோப்பைத் தரவேற்றி(upload)விட்டு அவர்கள் வழங்கும் இணைப்பை(link) நீங்கள்

உங்கள் நண்பரிற்கு மின்னஞ்சல் செய்துவிட்டால் போதும்.

http://www.nizal-sinmajan.blogspot.com

உங்கள் நண்பர் தான் விரும்பிய வடிவில் அதனைத் தரவிறக்கக் கொள்ளலாம்.உங்கள் நண்பர் விரும்பினால் நேரடியாக் pdf வடிவிலேயே

அந்தக் கோப்பைப் பெற்றுக்கொள்ளலாம்.

http://nizal-sinmajan.blogspot.com

DocDroid உங்களுக்கு கோப்புகளை Facebook, tweeter போன்ற சமூகத் தளங்களில் பகிர்ந்து கொள்ளும் வசதியையும் வழங்குகின்றது.நீங்கள் உங்கள் கோப்பை அழிக்காமல் விட்டால் 60 நாட்களுக்கு மேல் பார்வையிடாமல் இருக்கும் கோப்புகளை DocDroid தானாகவே அழித்துவிடும்.

DocDroid பின்வரும் வடிவங்களிற்கு(format) PDF, DOCX, DOC, ODT, PAGES, RTF, OTT, XLS, XLSX, TXT, PPT, PPTX, ODP தனது சேவையை இப்போது வழங்குகின்றது.

YouTube வீடியோவில் நீங்கள் விரும்பும் பகுதியை மட்டும் கத்தரித்து எடுக்க..

2010-10-24T10:28:00.005+05:30

நாம் சில சமயங்களில் பார்த்து ரசிக்கும் You Tube கானொளிக் காட்சிகளை

Face Book ,Twitter போன்ற சமூகத் தளங்களில் பகிர்ந்து கொண்டு யாம் பெற்ற இன்பத்தை/துன்பத்தை ;) மற்றவர்களையும் பெறச் செய்ய வேண்டுமென விரும்புவோம்..ஆனால் சில சமயங்களில் அவ் வீடியோவின் நீளம் பத்து நிமிடங்களை அண்மித்து பலரது பொறுமையைச் சோதித்து விடும்..இன்னும் சில சமயங்களில் அவற்றில் ஒரு சிறு பகுதி மட்டுமே ரசிக்கக் கூடியதாயிருக்கையில் பொறுமையாக முன்னேயுள்ள பகுதி load ஆகும்வரை பொறுமை பேணி எங்சிய பகுதிக் காணொலியைப் பார்க்க வேண்டி ஏற்பட்டு கடுப்பாக்குவதுமுண்டு..இனி மேல் இந்தக் கவலையை விட்டு விடுங்கள். சில இனையத் தளங்கள் You Tube வீடியோவின் ஒரு குறித்த பகுதியை மட்டுமே வெட்டியெடுத்து நாம் உபயோகிக்கக் கூடிய வடிவில் தருகின்றன.அவ்வாறான தளங்களின் இணைய முகவரியை முன்பொருமுறை வழங்கியிருந்தேன்.

tubechop தளத்தில் எவ்வாறு காணொளியைக் கத்தரிப்பது என்று சற்று விளக்கமாகப் பார்ப்போம்.

முதலில் tubechop தளத்திற்குச் செல்லுங்கள்.அங்கே நீங்கள் கத்தரித்து எடுக்க விரும்பும் Youtube காணொளியின் URL ஐ உரிய இடத்தில் வழங்குங்கள்.

அப்போது நீங்கள் வழங்கிய காணொளி தேடி எடுக்கப்பட்டுக் காட்சிப்படுத்தப்படும்.அதில் தோன்றும் chop it ஐ சொடுக்குங்கள்.

இனி நீங்கள் செய்ய வேண்டியதெல்லாம் நீங்கள் கத்தரிக்க விரும்பும் நேர இடைவெளியை வழங்குவது தான்.அதற்கு நீங்கள் கீழே கட்டமிட்டுக் காட்டப்பட்ட இரு வழிகளில் யாதாவதொன்றைப் பயன்படுத்தலாம்.இறுதியாக chop it ஐ சொடுக்கினால் போதும்.கானொளியில் நீங்கள் விரும்பும் பகுதி மட்டும் கத்தரிக்கப்பட்டு வழங்கப்படும்.

Publish Post

CrunchBase Information

TubeChop

Information provided by CrunchBase